هو إيه اللي بيحصل في البنوك اليومين دول؟ وليه كل شوية نسمع إن فيه بنك رفع الرسوم على الحسابات أو بطاقات الخصم؟ وهل ده معناه إن التعامل مع البنوك هيبقى أصعب وأغلى؟ ولا دي خطوة طبيعية في وقت البنوك نفسها بتواجه ضغوط كبيرة؟

عدد من أكبر البنوك المصرية بدأ يرفع الرسوم الإدارية والعمولات على شوية خدمات مصرفية أساسية.. زي فتح الحسابات وإصدار وتجديد الكروت البنكية.. وكمان المصاريف الربع سنوية اللي بتتخصم من الحساب.

الزيادات دي مش بسيطة.. تراوحت بين 25 و75 جنيه في معظم الحالات، والبداية كانت من البنك الأهلي المصري وبنك مصر، الكبار اللي دايمًا بيمهدوا الطريق لباقي السوق.

النهارده مثلاً البنك الأهلي رفع المصروفات الإدارية على الحسابات الربع سنوية لـ 75 جنيه بدل 50 في الحسابات العادية.. ولو حسابك متوسط بين 700 ألف و2 مليون الرسوم وصلت لـ 100 جنيه.. أما كبار العملاء اللي حساباتهم بين 2 و20 مليون جنيه بقت 125 جنيه.

وكمان كشف الحساب الورقي السنوي بقى بـ 100 جنيه بدل 75.. وتجديد الكروت بقى بـ 125 جنيه بدل 100 ولو كارت جولد، يبقى بـ 150 جنيه.

نفس الاتجاه بنك مصر ماشي عليه..ضاعف مصاريف كشف الحساب من 75 لـ150 جنيه.. ورفع الرسوم الإدارية الربع سنوية بين 75 و125 جنيه حسب نوع الحساب،وكمان زوّد عمولة الحد الأدنى للرصيد لـ 30 جنيه بدل 10.. طيب ليه بيعملوا كده؟ هل علشان يزودوا أرباحهم وخلاص؟ ولا فيه أسباب تانية ورا الكواليس؟

اللي أكده مسؤول مصرفي إن البنوك بقت تحت ضغط تكاليف تشغيل عالي جدًا.. من أول المرتبات، والتأمينات، والإيجارات .. لحد تحديث الأنظمة الرقمية والتطبيقات البنكية اللي كل شوية بيتم تطويرها علشان العملاء.

ببساطة.. البنوك بقت بتصرف أكتر علشان تفضل تقدم خدمات بجودة أعلى، وفي نفس الوقت الفوايد على الإيداع والإقراض بقت بتتغير بسرعة بعد قرارات البنك المركزي، فدخلها من العائد قل شوية، وده اللي خلّاها تراجع **مصادر دخلها التانية  اللي منها الرسوم والعمولات.

يعني البنوك بتحاول تعوّض جزء من تراجع الإيرادات بالرسوم دي، لكن كمان بتحاول توزّع الزيادات دي حسب نوع العميل،علشان متأثرش قوي على الناس العادية اللي عندهم حسابات بسيطة.

وفيه وجه تاني كمان للموضوع.. البنوك دلوقتي بتحاول تشجع الناس إنها تتعامل إلكترونيًا أكتر.. يعني بدل ما تروح الفرع تعمل كشف حساب أو تسحب ورق، تستخدم التطبيق أو الخدمات الرقمية، اللي أرخص وأسرع كمان.. وده السبب إن الرسوم العالية بتتطبق أكتر على الخدمات التقليدية، زي كشف الحساب الورقي أو العمليات اللي بتتعامل فيها جوه الفرع.

وفيه نقطة مهمة جدًا.. رغم كل الزيادات دي.. عدد الناس اللي عندهم حسابات في البنوك بيزيد بشكل واضح.. وده حسب بيانات البنك المركزي اللي قالت إن عدد المواطنين اللي عندهم حسابات نشطة وصل لـ53.8 مليون شخص في يونيو 2025.. وده بيمثل أكتر من 76% من المصريين البالغين رقم كبير جدًا مقارنة بالسنة اللي قبلها.