هو إيه اللي حصل في سوق الدهب عالمياً؟ إزاي الدهب يهبط فجأة بعد ما كان بيكسر قمم تاريخية؟ وهل الاتفاق التجاري اللي بيتحضر بين أمريكا والصين هو اللي قلب الترابيزة؟

ولو الاتفاق ده حصل فعلًا هل ده معناه إن الدهب لسه قدّامه هبوط أكبر وأعنف؟ والأهم… ده هيأثر إزاي على سعر الجرام عندنا في مصر خلال الأيام الجاية؟

آخر 24 ساعة كانت متقلبة جدًا في سوق الدهب.. السعر الفوري نزل بحوالي 2% بعد ما لمس مستويات قياسية كانت خلت ناس كتير تفتكر إن الاتجاه طالع ومكمل من غير سقف.


الهبوط مالوش سبب واحد لكن في 3 صدمات حصلوا تقريبًا في نفس الوقت:

أولً حجة  موجة جني أرباح بعد الصعود العنيف اللي حصل الأسبوع اللي فات، مستثمرين كتير قرروا يأمّنوا أرباحهم ويبيعوا عند القمة  ده خلق ضغط بيع متزامن.

تانى حاجة تصريحات ترامب عن الرسوم.. الرئيس الأمريكي طلع تصريح إن الرسوم الجمركية على الصين “مش هتستمر” — التصريح ده اتقري في السوق كإشارة تهدئة… والدهب أصله بيطلع مع الخطر مش مع الهدوء.

تلت أجواء اتفاق تجاري محتمل.. فيه تسريبات عن اتفاق جزئي بين بكين وواشنطن خلت شهية المخاطرة ترجع للأسواق  يعني المستثمرين خرجوا من الملاذات الآمنة زي الدهب ودخلوا تاني على الأسهم والدولار.

السؤال المهم.. هل الاتفاق فعلا هيوقع؟

لحد دلوقتي مفيش توقيع رسمي  لكن وجود مفاوضات فعّالة وتنازلات سياسية من الجانبين خلّى السوق يتعامل على إن التهدئة “غالبًا قادمة”..  ده لو حصل رسميًا معناه إن الدهب ممكن يكمّل هبوط لأن الطلب عليه كملاذ آمن هيفقد جزء من قوته.

ليه الذهب حساس تجاه الاتفاقات السياسية؟

لأن الدهب مش سلعة عادية هو مؤشّر “خوف” لما العالم يبقى متوتر  الدهب يطير ولما التوتر يهدأ الدهب يهدا وسعره ينزل .. يعني كل خطوة باتجاه هدوء النزاعات التجارية أو الجيوسياسية  ضغوط بيع على الدهب.

هل الهبوط ده نهاية الموجة؟ ولا مجرد تصحيح؟

المحللين شايفين احتمالين الأول هبوط مؤقت أو  “تصحيح” لو الاتفاق اتعطل أو حصل تصعيد فجائي من أي طرف الدهب ممكن يرد ويكسر قمم أعلى من اللي قبلها.

الخيار التاني  بداية اتجاه هابط.. لو الاتفاق التجاري اتوقع رسميًا + التضخم العالمي بدأ يهدى + الفيدرالي مارتاح من ضغوط الفائدة… وقتها الذهب ممكن يكسر مستويات دعم قوية ويدخل قناة هبوط مريحة.

طب ايه التأثير لمتوقع على مصر؟

السوق المحلي بيتحرّك دايمًا على مزاج الدولار و البورصة العالمية لو الدهب العالمي نزل  لكن الدولار عندنا ثابت  الهبوط داخلي هيبقى محدود.

لكن لو حصل سيناريو مزدوج دهب عالمي هابط  هدوء في الدولار  وقتها ممكن نشوف انخفاضات واضحة في السعر المحلي.