تخيل معايا تبقى أغنى واحد في العالم، ومع كده تعيش حياة عادية جدًا، لا سيارات فارهة، ولا قصور، ولا مظاهر! دي بقى يا سيدي حكاية وارن بافيت .. اللي الناس سموه "ملياردير الغلابة" الراجل اللي بدأ من ولا حاجة، وقرر في الآخر يتبرع بـ99٪ من ثروته عشان يساعد غيره! تعال نحكي مع بعض حكاية أغرب من الخيال!

القصة بدأت سنة 1930، لما اتولد ولد اسمه وارن بافيت في ولاية نبراسكا بأمريكا .. من صغره كان مختلف، دماغه شغالة 24 ساعة .. لدرجة انه وهو عند 11 سنة بس اشترى أول سهم في حياته! يعني في الوقت اللي صحابه كانوا بيلعبوا كورة، هو كان بيفكر إزاي يلعب بالفلوس!

ولما بقى عنده 14 سنة، بدأ يوزع جرايد قبل المدرسة، وكان بيكسب 175 دولار في الشهر رقم كبير جدًا وقتها!
بس بدل ما يضيعهم، اشترى بيهم أرض زراعية بـ1200 دولار!  يعني من بدري جدًا كان عنده عقل تاجر حقيقي وبدأ فعلا يتاجر ويكسب

كبر شوية ودخل كلية "وارتون"، وبعدها جامعة نبراسكا، لحد ما راح جامعة "كولومبيا" يتعلم على إيد أعظم مستثمر في التاريخ "بنجامين جراهام" وهناك اتعلم مش بس يحلل أرقام، لأ، اتعلم يفهم عقل السوق، ويقرأ الشركات كأنها قصص.

بعد سنين، اشترى شركة صغيرة اسمها بيركشاير هاثاواي، واللي كانت بتخسر وقتها، لكنه حولها بذكاؤه لإمبراطورية مالية بتمتلك استثمارات في كل المجالات من البنوك للتأمين للأكل والمشروبات.

وخليني اقولك ان الراجل ده وصل إنه يبقى أغنى رجل في العالم في فترات كتير، ومع كده عمره ما اتغر.. عايش في نفس البيت من 1958، بيحب يفطر من ماكدونالدز بـ3 دولار، وبيمشي عادي في الشارع من غير حراسة!  يعني ببساطة، الغنى عنده مش في الفلوس في العقل.

وبافيت كان دايمًا يقول: "لو عشت فوق مستواك، عمرك ما هتعرف تدخر". وكان شايف إن الادخار مش رفاهية، دي عادة لازم تتعلمها بدري.

وبيكره بطاقات الائتمان لأنها بتخلي الناس تعيش في الوهم وتغرق في الديون.. لكن المفاجأة الحقيقية حصلت لما قرر وهو عنده 75 سنة إنه يتبرع بـ99٪ من ثروته!.

ابتدى يوزع أسهمه في "بيركشاير هاثاواي" على مؤسسات خيرية، ولحد دلوقتي تبرعاته وصلت لأكتر من 37 مليار دولار!. وده السبب اللي خلا الناس تسميه: ملياردير الغلابة.

وبالرغم إنه دلوقتي فوق التسعين، لكنه لسه بيقضي 80٪ من وقته في القراية، وبيقول إن السر في نجاحه هو إنه يتعلم كل يوم أكتر من اللي قبله.

وارن بافيت مش بس راجل أعمال، ده مدرسة في الحياة .. علم العالم إن الغنى الحقيقي مش في اللي تملكه، لكن في إزاي تستخدم اللي عندك عشان تفيد غيرك.