هو ليه فجأة الاستثمارات العربية بقت في كل حتة في مصر؟ وليه دولة زي الإمارات بتضخ استثمارات ضخمة في قطاعات كتيرة في مصر؟ وهل الفلوس دي مجرد صفقات عقارات.. ولا وراها خطة أكبر بتغير شكل الاقتصاد المصري؟

في آخر 9 شهور بس، مصر استقبلت استثمارات عربية مباشرة بقيمة 4.17 مليار دولار يعني تقريبًا نص الاستثمارات الأجنبية اللي دخلت البلد كلها في الفترة دي، وده رقم كبير جدًا بيدل إن رأس المال العربي شايف في مصر فرصة حقيقية مش بس كلام.

وطبعًا في المقدمة كالعادة الإمارات العربية المتحدة اللي استحوذت لوحدها على أكتر من 50% من الاستثمارات العربية بقيمة وصلت لـ 2.4 مليار دولار خلال أول تسع شهور من السنة المالية اللي فاتت، وأغلب الفلوس دي راحت لقطاع العقارات.

وخد بالك، دي مش مجرد أرقام على الورق، ولكن مليارات فعلاً دخلت البلد، وخاصة بعد الصفقة التاريخية اللي حصلت في فبراير 2024 بين مصر والإمارات، لما شركة القابضة الإماراتية خدت حق تطوير مشروع رأس الحكمة بـ 24 مليار دولار، وكمان الإمارات حولت 11 مليار دولار من ودائعها في البنك المركزي علشان تموّل مشروعات استراتيجية.

يعني بنتكلم عن ضخ سيولة حقيقية، وفي نفس الوقت دعم مباشر للاقتصاد المصري في فترة صعبة.

لكن الإمارات مش لوحدها...فيه كمان السعودية وقطر والكويت دخلوا على الخط،والاستثمارات السعودية وصلت لـ 626.8 مليون دولار خلال التسع شهور،
والقطرية حوالي 262 مليون دولار،والأرقام دي مرشحة تزيد الفترة الجاية بعد ما قطر أعلنت نيتها تشتري أرض في علم الروم بالساحل الشمالي بـ 4 مليارات دولار لمشروع سياحي ضخم.

السؤال المهم.. ليه العرب بيركزوا دلوقتي على مصر؟

الخبراء بيقولوا إن السبب الأساسي هو الإصلاح المالي والنقدي اللي مصر نفذته خلال السنتين اللي فاتوا، من أول تحرير سعر الصرف، لحد ضبط السياسة النقدية وتشجيع الاستثمار الأجنبي وده خلا المستثمرين العرب يحسّوا إن المناخ بقى آمن أكتر ومغرٍ للضخ.. كمان الحكومة شغالة على خطة طموحة جدًا —
إنها تجذب أكتر من 100 مليار دولار استثمارات أجنبية مباشرة في الفترة من 2025 لحد 2030، يعني كل سنة هدفها يزيد عن اللي قبلها، بدءًا من 10.6 مليار دولار السنة دي، لحد 24.5 مليار دولار في 2030.

الجميل كمان إن نوعية الاستثمارات بدأت تتغير...يعني مش كلها بقت عقارات زي زمان، ودلوقتي في اهتمام واضح بقطاعات الصناعة، الطاقة، السياحة، البترول، والاتصالات.

وده باين من بيانات البنك المركزي اللي قالت إن القطاع الخدمي لوحده جذب 1.9 مليار دولار في الربع الأخير، والقطاع الصناعي 429 مليون دولار،
وكمان فيه استثمارات متزايدة في القطاع الإنشائي… كل ده بيقول إن المستثمر العربي مش داخل يشتري وبس...هو داخل يبني، يشغّل، ويصدر كمان.