من مهاجر لملياردير عالمي.. عرف بذكاءه يغير حياة البشرية ويحول حياته من ولد بسيط لواحد ثروته عدت الـ 200 مليار.

يا ترى مين هو سيرجي برين وايه علاقته بالانترنت وليه ليه الفضل في تغيير حياة البشرية وعرف ازاي يكون الثروة ديه تعالوا نعرف ايه الحكاية.

ولد بسيط  كان عايش في موسكو وفي يوم واحد حياته كلها اتقلبت اتولد سنة 1973 ولما كان عنده 6 سنين بس أسرته قررت تسيب روسيا وتسافر أمريكا بسبب الظروف السياسية وقتها راحوا ولاية ماريلاند وهناك بدأ فصل جديد من حياته ولد مهاجر لسه مش فاهم حاجة في الدنيا بس دخل مدرسة مونتيسوري وهناك بدأ يظهر الفضول والذكاء اللي هيغيروا حياته كلها حب العلوم والرياضيات وبدأ يلمع من وهو لسه في المدرسة.

دخل جامعة ماريلاند ودرس رياضيات وعلوم كمبيوتر وبعدها راح يكمل دراسات عليا في جامعة ستانفورد وهنا بدأت النقلة الحقيقية في حياته قابل شاب اسمه لاري بيج واشتغلوا سوا على مشروع بسيط وقتها اسمه BackRub وكانوا بيحاولوا يطوروا طريقة جديدة للبحث على الإنترنت في 1997 سجلوا دومين google.com وفي 1998 أسسوا الشركة رسميًا برأس مال 100 ألف دولار بس جوجل مكنتش مجرد شركة ولا مجرد محرك بحث ده كان اختراع بيغير شكل الإنترنت بالكامل طريقة جديدة بتستخدم تحليل الروابط علشان تقدم للمستخدم أدق نتيجة ممكنة وده خلاها تتفوق على كل اللي كانوا موجودين في السوق وقتها.. وفي خلال كام سنة بسيطة بقت جوجل أكبر محرك بحث في العالم.

والنهاردة بيتعمل على جوجل أكتر من 8.5 مليار عملية بحث يوميًا وسيرجي برين كان دايمًا في الصورة مش بس كمؤسس ده كان المحرك الأساسي ورا أفكار كتير خرجت من جوجل زي Waymo مشروع العربيات اللي بتسوق لوحدها وGoogle Glass النظارات الذكية وGoogle Lens اللي بيخلي الكاميرا تفهم وتشوف وتترجم وتتعرف على أي حاجة وGoogle X المختبر اللي بيشتغل على مشاريع شبه خيال علمي زي الإنترنت من البالونات والذكاء الاصطناعي المتقدم النهاردة سيرجي ثروته وصلت لـ 200 مليار دولار رقم يخليه من أغنى خمس أشخاص على كوكب الأرض ومعظم الثروة دي جاية من حصته في شركة ألفابت الشركة الأم لجوجل.

يعني من ولد مهاجر كان بيبدأ من الصفر بقى واحد من صناع المستقبل حرفيا وده مش كل حاجة لأنه تبرع بأكتر من 500 مليون دولار لأبحاث مرض باركنسون اللي أصاب أفراد من عيلته وده بيأكد إنه مش بس راجل أعمال ناجح ده كمان بيستخدم فلوسه في تغيير حياة ناس تانيين.

في 2023 رجع يشتغل تاني بكل قوة على مشروع اسمه Gemini مشروع ضخم بيحاول يوصل للذكاء الاصطناعي العام يعني AI يقدر يفكر ويتعلم ويفهم زي الإنسان بالظبط ومن هنا نقدر نقول إن سيرة سيرجي برين مش قصة نجاح عادية دي رحلة من طفل لاجئ مش معروف فين هيسكن ولا هيتعلم إزاي لإنسان قدر يبني واحدة من أكبر وأقوى شركات التكنولوجيا في العالم واللي لحد النهاردة تأثيرها بيوصل لكل واحد فينا حرفيًا وكل ده حصل لأنه حب العلم وما خافش من الحلم وعرف يوصل.