ركزت وحدة أبحاث بانكير، على عدد من التقارير الاقتصادية العالمية والمحلية، خلال جولتها في أسواق المال والاعمال والشركات والطاقة حول العالم.

والبداية من البنك المركزي اللى بدأ  يجني ثمار سنوات الإصلاح والقرارات الاقتصادية الصعبة اللى خدها صناع السياسة النقدية طول السنين اللى فاتت.

تحويلات المصريين العاملين برّه البلد عملت طفرة كبيرة خلال أول 8 شهور من السنة دي، وزادت بنسبة 47.2% ووصلت لحوالي 26.6 مليار دولار.. مقارنةً بحوالي 18.1 مليار دولار بس في نفس الفترة من السنة اللي فاتت.

وبحسب بيانات البنك المركزي، شهر أغسطس لوحده شهد قفزة كبيرة.. التحويلات فيه زادت بنسبة 32.6%، وسجلت تقريبًا 3.5 مليار دولار.. مقابل حوالي 2.6 مليار دولار في أغسطس 2024.

ولو بصّينا على السنة المالية اللي فاتت كلها، هنلاقي إن تحويلات المصريين برّه زادت بنسبة ضخمة — 66.2% — ووصلت لـ 36.5 مليار دولار، بدل 21.9 مليار دولار بس السنة اللي قبلها.

ولازم نعرف إن تحويلات المصريين في الخارج دي مش رقم وخلاص، دي واحدة من أهم مصادر العملة الصعبة اللي مصر بتعتمد عليها.. زيها زي إيرادات قناة السويس، والسياحة، والاستثمار الأجنبي المباشر.

ونروح لمشروع مهم .. هيئة قناة السويس وقّعت شراكة استراتيجية مع شركة “أنكوراج للاستثمارات” علشان ينشئوا مجمع صناعي ضخم للبتروكيماويات على أرض مملوكة للهيئة في العين السخنة جوه المنطقة الاقتصادية لقناة السويس شمال غرب خليج السويس.

المجمع ده في المرحلة الأولى هيشتغل على إنتاج مادة “البولي بروبيلين” وده منتج بيدخل في كل حاجة حوالينا من قطع سيارات لعلب تعبئة وتغليف لأجهزة كهربائية، يعني عليه طلب عالمي ضخم.. والمصدر الأساسي للبولي بروبيلين هيكون خام البروبان ومعاه هيطلع منتج ثانوي مهم… “الهيدروجين” سوقه العالمي بيكبر بشكل مرعب مع تحولات الطاقة النظيفة.

المرحلة الأولى لوحدها استثماراتها أكتر من 2 مليار دولار… والمرحلة التانية هتزود إنتاج بتروكيماويات تانية وكمان مصانع تكميلية معتمدة على التصدير بإجمالي استثمارات متوقعة تقارب 4.5 مليار دولار.

ومن البنك المركزي نروح للجنيه المصري اللى حافظ على مكاسبه الأيام اللي فاتت واستقر عند أعلى مستوى له من بعد تعويم مارس 2024.. وفيه اكتر من سبب لكده أهمهم ان الدولار نفسه بيقع عالمياً.. والعملة لأمريكية بتتعرض لضغوط كبيرة بسبب الإغلاق الحكومي المستمر هناك ومع صعود عملات رئيسية قدّامه زي اليورو والين  قوة الدولار اتراجعت، وده انعكس فوراً على أي عملة واقفة قصاده منهم الجنيه.

تانى حاجة  سيولة الدولار في مصر اتحسنت منظومة التدفقات الداخلة اتحسنت بقوة واحتياطي النقد ارتفع ووصل 49.533 مليار دولار بنهاية سبتمبر مقارنة بـ49.25 مليار أغسطس  زيادة حوالي 283 مليون دولار في شهر واحد.. مش بس كده  في أبريل اللي فات الاحتياطي كسر 48 مليار لأول مرة تاريخياً، ومن ساعتها وهو طالع بشكل مستمر ومستقر.

كمان برنامج صندوق النقد ماشٍ في الاتجاه الصحيح.. ورغم إن الصندوق لسه ما أعلنش نتيجة المراجعة الخامسة والسادسة، لكن المؤشرات اللي جاية من الاجتماعات إيجابية  ومسؤولين في الصندوق قالوا صراحة إن ملف الدعم والطروحات ماشي في الطريق اللي هم طالبينه.

ونروح لطنز دهب جديد تم كتشافه في مصر.. الأسبوع ده  شركة آفاق للتعدين المصرية أعلنت عن كشف تجاري جديد للذهب غرب جبل علبة في منطقة شلاتين، جنوب شرق الصحرا الشرقية.. والشركة بالفعل بتستعد تقدّم دراسة الكشف لهيئة الثروة المعدنية خلال أيام.

وحسب مصادر مطلعة الاحتياطيات الأولية للكشف الجديد متقدّرة بحوالي 200 ألف أونصة ذهب كمخزون أولي… رقم مش بسيط ويبمثل بداية حقيقية لمشروع تعدين جديد داخل نفس الحزام الذهبي اللي فيه منجم السكري.

الشركة هتقدّم دراسة الجدوى للهيئة.. والهيئة عندها 60 يوم عمل لفحصها ولو اعتمدتها يبدأ فوراً تأسيس شركة مشتركة بين آفاق للتعدين وبين شلاتين للثروة المعدنية اللي منطقة الامتياز بتقع ضمن نطاقها.. والكلام ده معناه بوضوح إن الدولة شريك مباشر في المشروع  من أول لحظة إنتاج.