هو إيه اللي بيحصل في قناة السويس؟ وليه العالم كله بيتكلم دلوقتي عن رجوع الحركة التجارية فيها؟ وهل ده فعلاً ممكن يكون بداية انتعاشة اقتصادية كبيرة لمصر بعد سنتين صعبين؟ ولا دي مجرد موجة مؤقتة وهتعدي؟

الأخبار الجاية من البحر الأحمر مبشّرة جدًا.. وبعد فترة توتر طويلة في الشرق الأوسط، خصوصًا حوالين باب المندب، الأوضاع بدأت تهدى تدريجيًا… والنتيجة ان عدد السفن اللي بتعدي من المضيق رجع يرتفع بشكل ضخم  من حوالي ٣٠ سفينة في اليوم، لـ ٨٠ سفينة يوميًا.. وده مش رقم بسيط.. ده معناه إن المرور التجاري رجع لطبيعته وإن قناة السويس بتستعيد نشاطها بكامل طاقتها بعد أكتر من سنتين كانت فيها الحركة متأثرة بالأحداث الإقليمية.

بس السؤال هنا.. إيه معنى ده للاقتصاد المصري؟
المعنى المباشر بسيط وواضح دولارات أكتر داخل خزينة الدولة.. لأن لما عدد السفن يزيد، الإيرادات بتزيد، والاحتياطي النقدي بياخد دفعة قوية، والجنيه بيستفيد.. يعني ببساطة  قناة السويس راجعة تاني تبقى واحدة من أهم مصادر العملة الصعبة في مصر.

اللي حصل كمان إن أسهم شركات الشحن العالمية بدأت تتحرك لفوق بعد الأخبار دي لأن العالم فهم إن الممر الملاحي الأهم في المنطقة بيرجع يشتغل بكامل قوته.. وده في حد ذاته رسالة طمأنينة كبيرة للأسواق إن التجارة راجعة، وإن الاضطراب اللي كان حاصل في البحر الأحمر بدأ يختفي.

لكن الأهم من كل ده… مصر نفسها رايحة على فين بعد كده؟ خاصة إنها خلاص بتقفل صفحة صندوق النقد الدولي، وبتبدأ تستعد لمرحلة جديدة اسمها ما بعد الصندوق.

اللي باين إن الحكومة بتحضّر نفسها بخطة واضحة للمرحلة دي.. والتركيز هيكون على تعزيز موارد الدولة الدولارية من مصادر مستدامة زي السياحة، الصادرات، الاستثمار الأجنبي، وطبعًا قناة السويس.

يعني بدل ما نعتمد على القروض، الاتجاه دلوقتي هو تعظيم الدخل الذاتي.. وفي نفس الوقت الحكومة بتشتغل على ملفات الإصلاح المالي، وتشجيع القطاع الخاص يدخل بقوة في المشاريع، علشان الاقتصاد يبقى أكثر مرونة، ومش مربوط ببرنامج تمويلي خارجي زي زمان.

ومع رجوع قناة السويس لطبيعتها.. بيظهر أمل حقيقي إن مصر تدخل على موجة استقرار جديدة مش مجرد انفراجة مؤقتة لأن القناة مش بس طريق مائي… دي شريان حياة اقتصادي وكل سفينة بتمر فيها معناها فرص أكتر عملة صعبة أكتر وضغط أقل على السوق.

اللي بيحصل النهارده ممكن يكون بداية فصل جديد في الاقتصاد المصري .. فصل عنوانه الاعتماد على النفس واسترجاع القوة الاقتصادية الحقيقية.