كل الناس واخدها بالها من الدهب، ونسبة كبيرة من الشعب المصري مش واخدين بالهم من الفضة، علي الرغم من ان الاستثمار فيه مربح جدا، وله فوايد استثمارية كبيرة في روؤس الاموال.. ياتري اية المكاسب اللي بتحققها الاستثمارات في الفضة.. وهل الاستثمار في الفضة هيجي عليها اليوم اللي هتكون أكبر من الذهب.. هبكين معانا للآخر وهنعرف التفاصيل..

الاستثمار في الدهب، واحد من اشهر العمليات الاستثمارية الموجودة حاليا في الشارع المصري، ومؤخرًا الفضة سجلت ارتفاعات كبيرة وبقت علي مر الوقت هدف للادخار للمستقبل، وفي نسبة كبيرة من المستثمرين حولت وجهتها من الاستثمار في الذهب للاستثمار في الفضة خصوصا أنها اقل في السعر، والأسعار دي خلت الفضة هيا الخيار الأفضل للاستثمار .

طيب اية اشهر الاسباب اللي خلت في اقبال كبير من الناس علي شراء الفضة ؟.

الفضة واحدة من المعادن اللي بتدخل في صناعات كتيرة جدا بسبب قدرته علي توصيل الحرارة والكهرباء بدرجة عالية جدا، وحاليا الفضة بقي داخلة في صناعات متطورة كتيرة زي الهواتف الذكية وأجهزة الحاسب الآلي والأنظمة الذكية للعربيات وخلايا الألواح الشمسية وصمامات المفاعلات النووية والبطاريات وكاميرات التصوير والطابعات، ودخولها في الانواع دي كلها من الصناعات خلي في اقبال كبير جدا علي شرائها وخلت سعر الفضة ارتفعت بشكل كبير في العالم، وده عكس الذهب اللي بينحصر دخوله في الصناعات القايمة علي الحلي وأدوات الزينة.

تاني سبب لارتفاع اسعار الفضة عالميا هي العلاقة الطردية بين التضخم والذهب، وكل ما التضخم زاد وغلاء المعيشة ارتفع أسعار الذهب بتزيد، وده عكس الفضة واللي مرتبطة بالصناعة، خصوصا أن الاستثمار في الفضة مش قايم بس علي شراء المشغولات الفضية بغرض الإدخار، وحاليا الاستثمار في الفضة تطور عن طريق شراء الأسهم في شركات التعدين على الفضة، ده غير أن صناديق الاستثمار المتداولة بدأت تشتري سبايك كتيرة من الفضة من أعيرة مختلفة .

ومؤخرا اسعار الفضة ارتفعت بشكل كبير، وده بالتزامن مع الارتفاع الكبير في اسعار الذهب واللي بيعتبر الملاذ الأمن لكتير من الناس والبنوك الوطنية لعدد كبير من الدول، لكنه دخول وتوسع الفضة في عدد كبير من الصناعات التكنولوجية الحديثة واللي خلت في ضغط علي المعدن الابيض .