الدهب هو أكتر استثمار حير العالم وقدر يثبت قوته وسط تقلبات الاقتصاد العالمي بس السؤال  هل سعر الدهب هيفضل في السماء ولا فيه مفاجآت جاية؟ وإيه اللي هيحصل لو كسر حاجز الـ3000 دولار عالميًا؟ خلونا نجاوب على الأسئلة دي ونشوف السيناريوهات اللي مستنية الدهب سواء في مصر أو على مستوى الأسعار العالمية.

 
من أول السنة الدهب ماشى بخطى واثقة كسر حاجز الـ 2600 دولار للأونصة، وكل المؤشرات بتقول إنه بيستعد لختام السنة بمكاسب قوية .. لأن الوضع الاقتصادي العالمي في حالة اضطراب من أزمات البنوك لتوترات جيوسياسية..  والناس بتدور على ملاذ آمن لاستثماراتهم. وفي مصر الجنيه في مواجهة ضغوط تضخمية كبيرة والدهب بقى الوجهة المفضلة للحفاظ على القيمة

تحليل الخبراء بيقول إن الدهب ممكن يوصل لـ 2700 دولار في الربع الأخير من 2024.. وده لو فضل الاحتياطي الفيدرالي الأمريكي مستمر في تخفيف أسعار الفايدة.. لكن لو التوترات الجيوسياسية زادت،ممكن نشوف أرقام تاريخية توصل لـ3000 دولار للأونصة.. كمان الطلب المتزايد من البنوك المركزية خاصة في آسيا بيدعم أسعار الدهب في المدى الطويل.. و الخبراء شايفين إن الدهب هيظل الاستثمار المضمون في وجه الأزمات الاقتصادية العالمية

وفي مصر القصة ليها أبعاد مختلفة شوية.. الجنيه المصري  بيخوض معركة صعبة قدام  الدولار.. وده بينعكس مباشرة على أسعار الدهب المحلية.., التوقعات بتشير إن المعدن الأصفر هيكمل في صعوده مع استمرار التحديات الاقتصادية وزيادة الطلب على السبائك والجنيهات الذهبية كوسيلة لحفظ الأموال. هل ممكن نشوف تجاوز الأسعارحاجز 4 الاف جنيه للجرام عيار 21.. وارد جدًا مع استمرار التضخم وزيادة الاستيراد

دلوقتي أكيد  السؤال اللي بيدور في بالك "أشتري ولا أبيع؟

لو نيتك استثمار طويل المدى، الخبراء بينصحوا إن الدهب هيفضل أمانك الأول.. أما لو نويت مضاربة تابع حركة الدولار وسعر الفائدة العالمية لأن أي تغيير ممكن يكون فرصة لتحقيق أرباح.

زلو بتفكر تشتري دلوقتي وقت مناسب لو نيتك استثمار طويل الأجل لأن كل المؤشرات بتشير لاستمرار صعود الأسعار.. ولو نيتك بيع راقب السوق المحلي والعالمي، لأن تحركات سعر الدولار وأسعار الفائدة ممكن تكون فرصتك لتحقيق مكسب سريع

وفي عالم مليان تغيرات وضغوط، الدهب دايمًا بيحافظ على مكانته كاستثمار آمن. لكن القرار ليك: هتستثمر النهارده وتستنى عوائد المستقبل؟ ولا هتفضل متابع من بعيد؟ سوق الدهب مليان أسرار، وأنت المفتاح لتحديد المكسب

وفي النهاية الدهب مش مجرد معدن ده مؤشر للي بيحصل حوالينا في الاقتصاد والسياسة. فلو مستقبلك المالي يهمك، لازم تكون عارف إن قراراتك النهارده ممكن تغير معادلات بكرة..و افتكر إن السوق مليان مفاجآت، والدهب دايمًا ليه بريقه الخاص. والقرار في إيدك