اللي مش واخد باله، يمكن ميعرفش إن في مصر دلوقتي 9 مناطق حرة عامة شغالة في محافظات مختلفة، والمناطق دي تعتبر من أنجح نماذج الاستثمار اللي عندنا.

عشان هي مش بس بتوفر فرص شغل، لكن كمان بتدخل مليارات من العملة الصعبة وبتفتح الباب للمستثمرين المصريين والأجانب في بيئة مريحة وسهلة.

المناطق الحرة دي ببساطة، أماكن الحكومة مخصصاها للاستثمار، فيها تسهيلات كبيرة جدًا زي الإعفاء من الجمارك والضرائب، وحرية في تحويل الأرباح للخارج.

ودلوقتي عندنا 9 مناطق عامة فيها حوالي 1224 مشروع برؤوس أموال وصلت لـ 14.7 مليار دولار وتكاليف استثمارية عدت ال 38 مليار دولار، ووفرت أكتر من 220 ألف فرصة شغل.

كمان بتساهم لوحدها بحوالي 20٪ من صادرات مصر غير البترولية  يعني رقم ضخم جدا!

وأشهر المناطق دي:
منطقة الإسكندرية (العمرية):
و دي من أقدم وأكبر المناطق الحرة، على مساحة ضخمة قريبة من ميناء الدخيلة ومطار برج العرب.

فيها مصانع ملابس، أدوية، كيماويات، وبلاستيك، وبتعتبر مركز تصدير كبير بسبب موقعها الساحلي.

منطقة مدينة نصر القاهرة:
دي منطقة في قلب العاصمة، فيها أكتر من 200 مشروع، ورؤوس أموال حوالي 3.5 مليار دولار، ووفرت شغل لآلاف الشباب.

بس موقعها جوه القاهرة وبيسهل على الشركات التعامل مع السوق المحلي بجانب التصدير.

منطقة السويس:
دي بقى عند قناة السويس، وبتخدم الاستثمار الصناعي والتجاري المرتبط بالملاحة والنقل البحري.

وجودها على البحر بيخليها مثالية للتصنيع والتصدير السريع للأسواق الخارجية.

منطقة قفط – قنا:
دي بقى في الصعيد، وهدفها تشجيع الاستثمار في الجنوب.

رغم إنها لسه مش مزدحمة زي الباقيين، لكنها بتفتح فرص كويسة بأسعار أراضي أقل وبنية تحتية بتتحسن مع الوقت.

نيجي بقى لمميزات المناطق الحرة:
وخليني اقولك ان اللي بيشتغل في منطقة حرة مش بيدفع جمارك ولا ضرائب على الصادرات، وبيقدر يدخل خامات من بره بحرية.

كمان المستثمر يقدر يحول أرباحه برا البلد من غير تعقيدات.

وفيه كمان دعم حكومي قوي علشان المناطق دي تفضل تجذب شركات جديدة.

بس أهم حاجة ان المناطق دي بتخدم كل نوع استثمار، سواء مصانع، مخازن، أو شركات تصدير.

يعني اللي عايز يستثمر يختار المكان حسب نشاطه:

يعمي عندك مثلا الإسكندرية والبحر الأحمر مثاليين للتصدير.

والقاهرة ومدينة نصر كويسين للمشاريع التجارية والإدارية.

اما الصعيد فيه فرص أرخص للمشاريع اللي عايزة تبدأ من بدري وتكبر مع الوقت.

يعني من الاخر كده المناطق الحرة في مصر مش مجرد أراضي صناعية.. دي محركات استثمار بتتحرك بسرعة، وبتكسب الدولة عملة صعبة، وبتخلق فرص شغل حقيقية.

وكل سنة، الحكومة بتطورها أكتر علشان تفضل باب مفتوح للمستثمرين الجداد، وتخلي مصر دايمًا وجهة جاذبة لرؤوس الأموال من كل مكان.