لما تبقى برة مصر.  يبقي نفسك قي أي حاجة من ريحة البلد.

بتقعد تفكر أفي هلك، بيتك،  في حسابك اللي كان في البنك، وتقول: يا ريت لو أقدر أتعامل وأنا هنا؟

النهارده الحلم ده بقى حقيقة. مصر بتقولك: حتى وانت برّه.. حسابك في مصر مفتوح ليك! 

خطوة جديدة من البنك المركزي بتقرب كل مصري في الخارج من بلده، وبتأكد إنك جزء من خطة التنمية اللي بتحصل جوّه البلد.

في إطار رؤية الدولة المصرية لتقريب كل الخدمات للمصريين في الخارج.

البنك المركزي المصري بالتعاون مع وزارة الخارجية والهجرة، أعلنوا عن إطلاق مبادرة اسمها افتح حسابك في مصر.
المبادرة دي بالتنسيق مع البنك الأهلي المصري وبنك مصر، علشان تقدر كمصري في الخارج تفتح حساب بنكي بسهولة ومن غير ما تسافر.

طب تعمل ايه عشان تفتح حساب؟
التفاصيل بسيطة جدًا:

هتروح لأقرب سفارة أو قنصلية مصرية في البلد اللي إنت فيها.

هتملا نموذج فتح الحساب، توقّع عليه، والسفارة هتصدّق الورق وتبعته لوزارة الخارجية في القاهرة، ومنها يوصل للبنك اللي اخترته، سواء الأهلي أو مصر، والبنك هيكمل الإجراءات ويفتحلك حسابك في مصر بكل أمان.
يعني بمنتهى البساطة… بلدك بتوصلك الخدمة لحد عندك.

محافظ البنك المركزي المصري، حسن عبدالله، أكد إن المبادرة دي خطوة مهمة جدًا لتشجيع المصريين في الخارج يحولوا مدخراتهم للبنوك المصرية.

وقال بالحرف: المبادرة دي هتشجع تحويلات المصريين بالخارج، وهتسهّل استثمار مدخراتهم جوّه البلد.

وأكد كمان إن القطاع المصرفي هيستمر في التنسيق مع وزارة الخارجية لإطلاق مبادرات جديدة لخدمة المصريين في الخارج، زي مثلًا تحويل الأموال لحظيًا على مدار الأسبوع كله، وتطوير الخدمات الرقمية بشكل مستمر.

أما الدكتور بدر عبد العاطي، وزير الخارجية والهجرة وشئون المصريين بالخارج، فقال إن المبادرة دي جزء من توجيهات القيادة السياسية لتوفير أفضل رعاية للمصريين في الخارج.

وأضاف: المبادرة دي بتضاف لسلسلة من المبادرات اللي الدولة أطلقتها، زي الإسكان والاستثمار والتأمين، علشان نوفر للمصريين برا نفس الاهتمام والرعاية اللي بيلاقوها جوّه البلد.

وكمان وجّه رسالة للمصريين في الخارج: استفيدوا من المبادرات دي، دي معمولة علشانكم، علشان بلدكم، وعلشان كل تحويلة وكل استثمار منكم بيقوّي الاقتصاد وبيشارك في التنمية اللي بتحصل في البلد.

مبادرة افتح حسابك في مصر مش مجرد خدمة بنكية دي رسالة من بلدك ليك: إنت مهما كنت بعيد، لسه ليك مكان وحساب وحق في أرضك.

روح أقرب قنصلية أو سفارة مصرية، افتح حسابك، وسهّل على نفسك كل تعاملاتك البنكية، وخليك دايمًا جزء من مستقبل بلدك.