تخيل كدا أن الكهربا اللي بتنور بيتك هي هي اللي بتنور بيوت في روما ودول أوروبا.. ومش بس كدا دول كمان بيستوردوها من مصر.. وفي تحركات كبيرة بتحصل على الأرض بتحول مصر زي ما بيقولوا لبطارية لدول أوروبا من خلال مشروعات عملاقة بدأت تخرج للنور.
مصر دلوقتي بقت تلعب على كبير وبتجهز ثلاث خطوط ربط كهربائي تحت البحر المتوسط شغالين علشان ينقلوا 8000 ميجاوات من كهربا مصر لقلب أوروبا.
أول خط اسمه يوروأفريكا وده بيربط مصر بقبرص ومنها لليونان طوله حوالي 498 كم لحد قبرص وبعدها يكمل لليونان الجسر الكهربائي ده مش بس بيكسر عزلة قبرص عن الشبكة الأوروبية لأ ده كمان أول منفذ مباشر لمصر على أوروبا وبيوصل 2000 ميجاوات.
تاني خط اسمه جريجي وده من مصر مباشرة لجزيرة كريت في اليونان ومن كريت على أوروبا كلها طوله حوالي 950 كم وقدرته 3000 ميجاوات وده مشروع ضخم بيصدر الكهربا الخضراء من غير ما يعدّي على دول تانية يعني خط مباشر كده من هنا لهناك.
أما الخط التالت فده حكاية لوحده اسمه "الوريد الأخضر" وده بيربط مصر بإيطاليا بطول 2800 كم تحت البحر وقدرته 3000 ميجاوات يعني فتحنا منفذ لتالت دولة أوروبية وبقينا مش بس بنصدر كهربا دي إحنا بقينا مركز رئيسي لأمن الطاقة في أوروبا كلها.
الموضوع مش مجرد خطوط وكابلات تحت الميّه لأ إحنا بنتكلم عن مشروع استراتيجي بيغيّر شكل الخريطة السياسية والاقتصادية للمنطقة أوروبا اللي بتحاول تقلل اعتمادها على الغاز الروسي دلوقتي بتبص لمصر على إنها بطاريتها الجديدة.

طب وإزاي مصر أصلاً عندها كهربا زيادة تصدّرها؟ ببساطة مصر خلال العشر سنين اللي فاتوا ضخت استثمارات بالمليارات في محطات عملاقة للطاقة المتجددة زي الشمس والرياح النووي كمان داخل على الخط.
عندك مثلاً محطة أبيدوس في أسوان دي واحدة من أكبر المحطات الشمسية في أفريقيا قدرتها 1500 ميجاوات المرحلة الأولى منها اشتغلت من آخر 2024 وقدرتها 500 ميجاوات.
وعندك بنبان مدينة الشمس المصرية أكبر مجمع طاقة شمسية في الشرق الأوسط وأفريقيا بتنتج أكتر من 3.8 تيراوات في السنة يعني كفاية تنوّر ملايين البيوت.
في الرياح عندك مشروع سكاتك النرويجي في رأس شقير قدرته 900 ميجاوات وكمان أكوا باور السعودية اللي بتبني مزرعة رياح في خليج السويس بـ1100 ميجاوات وده مشروع من الأكبر في القارة كلها.
كل المشاريع دي بتغذي الشبكة المصرية بالكهربا النظيفة اللي ماشية على طول في خطوط الربط لأوروبا يعني اللي داخل طاقة خضرا واللي طالع طاقة خضراء.
الاتحاد الأوروبي نفسه حاطط المشروعين EuroAfrica و GREGY ضمن مشروعات المصلحة المشتركة يعني ممولين رسميًا وواخدين دعم كامل أما مشروع إيطاليا فداخل في مفاوضات لتمويل ضخم ممكن يوصل لـ20 مليار دولار.
في النهاية إحنا مش بس بنصدر كهربا إحنا بنغيّر قواعد اللعبة في شرق المتوسط كل ميجاوات بتدخل أوروبا من مصر بتقوّي موقفنا وبتخلي أمننا جزء من أمنهم أي أزمة عندنا هتتحسب عندهم إحنا بقينا مركز طاقة ومورد استراتيجي مش سهل الاستغناء عنه.
مصر دلوقتي مش بتقدّم كهربا بس مصر بتبيع استقرار بتبيع أمان بتبيع نفوذ والطريق لده كان بسيط… استثمار ذكي في الشمس والرياح وتخطيط استراتيجي وتحوّل من مستهلك لمورّد ومن مورد لعِملاق.
0 تعليق