أشاد محمود الخطيب رئيس مجلس إدارة الأهلي، برجل الأعمال ياسين منصور، المرشح على مقعد نائب الرئيس في الانتخابات القادمة، والمقرر لها يومي 30، 31 أكتوبر الجاري.

إشادة الخطيب بياسين منصور

قال محمود الخطيب: “ياسين منصور واحد من أهم رجال الاستثمار والاقتصاد والإدارة المالية في مصر والمنطقة العربية، هو إضافة كبيرة جدا جدا”.

وتابع خلال ندوة قائمته بفرع الشيخ زايد: “هو اشتغل معانا في مجلس الإدارة قبل كده، وعارف النادي كويس وقدم للنادي الأهلي رؤيته وأفكاره في كثير من الموضوعات”.

وأضاف: “إذا كان بنتكلم في مشروع للنادي الأهلي بيقول في التوقيت المناسب رؤيته عاملة إزاي، ولو بنتكلم في حاجة رياضية أو غير رياضية بيقول برضو رؤيته، واحنا في مجلس الإدارة بنسمع للرؤية اللي بتواكب فكر المجلس، وكتير جدا كنا بناخد الرؤى دي من خلال ياسين”.

دور ياسين منصور ومساهمته الدائمة في الأهلي

وزاد: “زمان لما استقرينا على عودة مستر مانويل جوزيه، سافرنا أنا وياسين منصور وهنا اتأكدت من قدرته على التفاوض، القعدة أخدت وقت بسيط جدًا، كنت مختلف أنا وجوزيه ولكن ياسين قدم الحل المناسب برؤية مختلفة”.

وأكمل: “ودي من الحاجات اللي الناس مش عارفاها، هو شارك في حاجات كتير جدًا بس هو مكانش بيحب يتقال إيه اللي تم، ودي من صفات ولاد النادي الأهلي اللي بيخدموا النادي بدون ما يفكروا في استعراض أساميهم”.

وذكر: “ياسين منصور من وهو صغير أهلاوي جدًا، وكان بيسافر وهو لسه طالب صغير ورا النادي الأهلي في كل سفرياته، كل مباراة بنلعبها ياسين كان بيكون على السور عشان يتفرج”.

وأتم الخطيب تصريحاته: "الأولوية في الفترة المقبلة لالاستثمار، المصروفات بتزيد كل يوم ولازم نواكب ده، شعارنا في الانتخابات هو "تكملة المشوار.. تنمية واستثمار".