في خطوة ممكن تغير خريطة الطاقة في الشرق الأوسط، مصر والسعودية أعلنوا رسميًا إنهم هيبدأوا تشغيل المرحلة الأولى من مشروع الربط الكهربائي بينهم في ديسمبر الجاي.

المشروع ده مش بس أرقام وأسلاك وكابلات، ده إنجاز استراتيجي كبير هيخلي البلدين في قلب شبكة كهربا ضخمة بتربط العالم العربي ببعضه، وممكن كمان تمتد بعدين لأوروبا وآسيا.

الموضوع ببساطة إن مصر والسعودية شغالين بقالهم سنين على مشروع عملاق اسمه "الربط الكهربائي"، هدفه الأساسي إن الكهربا تتبادل بين البلدين حسب احتياج كل واحد فيهم.

والمشروع ده اتكلف حوالي 1.8 مليار دولار، ونسبة التنفيذ وصلت دلوقتي لـ 95%، يعني خلاص قربنا نشوف النور بين مصر والسعودية لأول مرة في التاريخ.

وعشان تبقى عارف.. المرحلة الأولى هتشتغل في ديسمبر 2025 بقدرة 1500 ميجاوات، وبعدها في 2026 هيكمل التشغيل الكامل بقدرة 3000 ميجاوات.. يعني المشروع ده هيقدر ينقل طاقة تكفي مئات الآلاف من البيوت والمصانع في البلدين.

الجميل في الربط ده إن مصر والسعودية عندهم فروق في مواعيد استهلاك الكهربا، فمصر تقدر تصدر كهربا للسعودية في أوقات النهار لما يكون عندها فائض، والسعودية تقدر تبعت لمصر في الليل وقت الذروة، وبكده نضمن ان مفيش كهربا بتتهدر، وكل شبكة بتستفيد من التانية.

الخط اللي هيوصل البلدين طوله حوالي 1300 كيلومتر، منهم 20 كيلومتر كابلات بحرية بتمر تحت خليج العقبة، والباقي خطوط برية ومحطات تحويل رئيسية في بدر في مصر وتبوك في السعودية.

كمان بيستخدموا أحدث تكنولوجيا في العالم وهي نظام التيار المستمر عالي الجهد HVDC ±500 كيلوفولت، اللي بيقلل الفاقد ويخلي النقل أكتر كفاءة.

اما من ناحية التمويل، التكلفة متقسمة نص بالنص بين الحكومتين المصرية والسعودية، ومعاهم دعم من مؤسسات عربية ودولية، وشارك في التنفيذ شركات عالمية متخصصة في الكابلات البحرية والربط الكهربائي.

وخليني اقولك ان المشروع ده مش بس تعاون بين بلدين، ده خطوة ضمن رؤية أكبر اسمها "الربط الكهربائي العربي – الأوروبي"، اللي هيخلي في المستقبل الكهربا تمشي من الخليج لحد أوروبا عن طريق مصر .. تخيل إن كهربا في الرياض ممكن توصل أثينا مثلًا!

غير كده، مصر هتستفيد بشكل مباشر من المشروع لأنها بقت دلوقتي مركز إقليمي للطاقة، ومع التوسع في مشاريع الطاقة المتجددة من رياح وشمس اللي وصلت لـ 8.3 جيجاوات، مصر بقت عندها فائض كهربا كبير ممكن تصدره للعالم كله.

في النهاية، مشروع الربط الكهربائي بين مصر والسعودية مش مجرد "كابلات ونقل طاقة"، ده مشروع تكامل حقيقي، بيقوي العلاقات بين البلدين، وبيفتح باب جديد للتعاون العربي في مجال الطاقة، وبيثبت إن المنطقة رايحة ناحية مستقبل أكتر استقرار وكفاءة في استخدام مواردها.