مصر بتدشن أول مشروعات المثلث الذهبي بمدينة سفاجا باستثمارات تتجاوز نصف مليار جنيه، بس يا ترى ليه اختاروا سفاجا بالذات لإنشاء المركز اللوجيستي؟، وإيه الميزة اللي فيها عن باقي المدن الساحلية؟، وهل المشروع ده فعلا هيخلي صعيد مصر أقرب للتصدير والعالم الخارجي؟، والمركز ده ممكن فعلا يغير شكل التجارة في البحر الأحمر؟

النهارده مصر بتكتب صفحة جديدة في ملف التنمية والتصنيع، وخصوصا في مدينة سفاجا على البحر الأحمر، بعد الإعلان عن توقيع عقد إنشاء أكبر مركز لوجيستي متكامل باستثمارات بتتجاوز نص مليار جنيه، المشروع ده بيتنفذ بين الهيئة الاقتصادية للمثلث الذهبي وشركة بيت اللوجيستيات، وده بحضور قيادات كبيرة من الحكومة والقطاع الخاص.

المشروع هيتبني على مساحة 15 فدان تقريبا، يعني حوالي 65 ألف متر مربع، وهيكون المرحلة الأولى من خطة ضخمة لتطوير منطقة المثلث الذهبي اللي الدولة شغالة عليها بقالها سنين.. الهدف الأساسي إن سفاجا تتحول لمركز إقليمي مهم لتجارة الصادرات والواردات، وتخدم كمان مناطق الإنتاج في صعيد مصر، عشان البضايع تطلع وتتنقل بشكل أسرع وأرخص.

المشروع ده مش مجرد مبنى أو مخزن، ده ترجمة فعلية لرؤية القيادة السياسية اللي دايمًا بتتكلم عن دعم الاستثمار وتمكين القطاع الخاص يبقى شريك حقيقي في التنمية.. أما بقى عن تفاصيل المشروع نفسه، فالمركز هيضم مخازن ضخمة بمساحة 16 ألف متر مربع وبارتفاع 18 متر، بطاقة تشغيلية توصل لمليون طن في السنة.

كمان فيه ساحة ضخمة لتداول الحاويات والبضائع العامة على مساحة 50 ألف متر مربع، تقدر تستوعب حوالي 100 ألف حاوية سنويًا، بالإضافة لـ مبنى إداري ومركز تحكم إلكتروني حديث فيه أحدث أنظمة المراقبة.

مش بس كده، المركز هيكون فيه محطة صيانة وإصلاح للحاويات وفق أعلى معايير الجودة، وكمان نظام إلكتروني لإدارة العمليات والمخزون، ومعاهم أسطول نقل بري شغال بالطاقة النظيفة، يعني المشروع كله متوافق مع الاتجاه العالمي للتحول الأخضر.

المثير أن المشروع ده كمان هيوفر حوالي 350 فرصة عمل مباشرة وغير مباشرة لأبناء البحر الأحمر، ومعاهم كمان قاعة تدريب متخصصة لتأهيل الشباب في مجالات النقل واللوجستيات عشان يكون عندنا كفاءات محلية جاهزة تشيل الشغل ده على كتفها.

المفاجأة بقى أن المشروع ده يعتبر بداية حقيقية لتنمية المنطقة وتحويلها لمنطقة اقتصادية متكاملة تجمع بين التعدين والطاقة والخدمات اللوجستية، وده بفضل موقعها المميز اللي بيربط صعيد مصر بموانئ البحر الأحمر.

وأخيرا، أن اللي بيحصل في سفاجا مش مجرد استثمار عادي، ده انطلاقة جديدة في البنية التحتية اللوجستية لمصر، ورسالة واضحة إن الدولة ماشية بخطى ثابتة نحو التنمية المستدامة، وإن الشراكة بين الحكومة والمستثمرين الوطنيين هي المفتاح الحقيقي لأي نهضة اقتصادية جاية.