البنك المركزي بدأ يجني ثمار سنوات الاصلاح والقرارت الصعبة اللى خدها على مدى لسنين اللى فاتت .. والنهاردة عوايد الدولار من قطاع ومصدر مهم لتسجل أرقام تريخية محصلتش قبل كده .. فيا ترى إزاي تحويلات المصريين قفزت قفزات كبيرة جدا فى أخر سنة ؟ وايه أهمية لتحويلات دي للاقتصاد المصري؟

تحويلات المصريين العاملين برّه البلد عملت طفرة كبيرة خلال أول 8 شهور من السنة دي، وزادت بنسبة 47.2% ووصلت لحوالي 26.6 مليار دولار.. مقارنةً بحوالي 18.1 مليار دولار بس في نفس الفترة من السنة اللي فاتت.

وبحسب بيانات البنك المركزي، شهر أغسطس لوحده شهد قفزة كبيرة.. التحويلات فيه زادت بنسبة 32.6%، وسجلت تقريبًا 3.5 مليار دولار.. مقابل حوالي 2.6 مليار دولار في أغسطس 2024.

ولو بصّينا على السنة المالية اللي فاتت كلها، هنلاقي إن تحويلات المصريين برّه زادت بنسبة ضخمة — 66.2% — ووصلت لـ 36.5 مليار دولار، بدل 21.9 مليار دولار بس السنة اللي قبلها.

ولازم نعرف إن تحويلات المصريين في الخارج دي مش رقم وخلاص، دي واحدة من أهم مصادر العملة الصعبة اللي مصر بتعتمد عليها.. زيها زي إيرادات قناة السويس، والسياحة، والاستثمار الأجنبي المباشر.

نروح لنقطة تانية مرتبطة بالعملة الصعبة برضه.. البنك المركزي المصري أعلن إن صافي الاحتياطي النقدي ارتفع في نهاية سبتمبر 2025، ووصل لـ 49.533 مليار دولار.. مقارنة بحوالي 49.25 مليار دولار في نهاية أغسطس اللي فات.. يعني زيادة بحوالي 283.5 مليون دولار في شهر واحد.

الزيادة دي مش جاية صدفة، لأ.. ده نتيجة إن إيرادات الدولة من العملة الأجنبية بقت في تحسن واضح.. الصادرات طالعة لفوق من بداية السنة، وكمان دخل السياحة بدأ يزيد.

إحنا قدام مؤشرات إيجابية في مصادر النقد الأجنبي لمصر  سواء من تحويلات المصريين برّه أو من احتياطي الدولة وده بيدي رسالة إن الاقتصاد بيتحرك في اتجاه أفضل الفترة دي.