ساعات وتنطلق أولى جلسات محاكمة اللاعب إمام عاشور، نجم النادي الأهلي في التعدي على موظف أمن بمول بالشيخ زايد.. وفي هذا التقرير نستعرض أقوال اللاعب في القضية.

محاكمة اللاعب إمام عاشور

عن تفصيل الحادث، نفى امام عاشور، لاعب النادي الأهلي ، ٢٦ سنة، تهمة التعدي عمداً بالضرب علي المجني عليه عبدالله مصطفي وإحداث الإصابات الموصوفة بالتقرير الطبي والتي أعجزته عن أشغاله مدة تقل عن عشرين يوماً .

إمام عاشور نجم الأهلي في الاعتداء على أمن مول الشيخ زايد

وقال نجم الأهلي أن زوجته تعرضت للتحرش والمعاكسة قائلا : « اللي حصل انا كنت في الرحاب في التجمع الخامس مع صاحبي محمود وجالي تليفون من مراتي بتقولي ان فيه شباب عاكسوها وعايزاني اكلم معاذ اخوها اهديه علشان ميعملش مشكلة وساعتها انا كلمت عمر اخو مراتي الكبير وقولتله قول لمعاذ يهدي ميعملش حاجة ولما تطلعوا من السينما في اركان بلغوا مشرفين الامن باللي حصل ويتحفظوا عليهم لحد ما أجي ونعمل محضر».

وتابع عاشور : «لما وصلت لقيت مراتي قعدة في العربية اخدت معاذ اخوها الصغير ودخلت معاه أركان ومشرفين الامن حاولوا يوقفوني ويقولولي استني استني فانا دخلت وجم ورايا علشان معاذ قالي انهم متحفظين عليهم في الباركنج اللي تحت ولما نزلت تحت ملقتش حد وكان فيه زحمة لان الناس اتلمت لما شافوني وانا كنت بقول هما فين هما فين وبزعق وساعتها مشرفين الامن قالولي انت بتزعق ليه انتم المفروض متحفظين علي شباب عاكسوا مراتي هما فين طبعا محدش رد عليا وكذا واحد من مشرفين الامن طلعوا تليفوناتهم وانا بتكلم وبيصوروني وقولتلهم انتم بتصوروني ليه وحصل ازدحام في اللحظة دي وانا مشتبكتش مع حد فيهم وبدور وشي لقيت عبدالله واقع علي الأرض ومشوفتش عبدالله غير وهو واقع علي الأرض وأول ما شفته واقع علي الأرض انا جريت عليه ولما وقع علي الأرض انا قلعته الجزمة وبحاول افوقه وفاق بعدها علطول وقولت للناس بعد اذنكم يا جماعة وسعوا علشان الراجل اللي وقع ياخد نفسه ولما قام وفاق قعد يقولي انه عنده اسرة واولاد وعايزك تساعدني والموضوع انتهي واخدت بعضي ومشيت والراجل اللي وقع اللي اسمه عبدالله بقي كويس واخدت مراتي واهلي وكانوا مستنيين بره مول أركان وروحنا واتفاجئت لما روحت ان فيه خرابيش في ايدي من الزحمة والزق ومراتي قالتلي انت ساكت ليه متعمل قضية قولتلها انا مش عايز اؤذي حد».

وعن موعد وصوله لمول الشيخ زايد وموعد الحادث قال عاشور أنه وصل في تمام الساعة السادسة صباحا موضحا :«زوجتي قالتلي ان فيه شباب عاكسوها في أركان وان معاذ اخوها عايز يعمل مشكلة وعايزاني اكلمه علشان أهديه».

وتابع : « لا هي مراتي مقالتليش اللي حصل بالضبط ان حد عاكسها بس معاذ قالي ان فيه واحد كان لابس جلابية، هما بس قالولي ان فيه حد عاكسها وانا حضرت علشان اعرف فيه ايه».

وقال إمام عاشور : « كان في مشرفين أمن كتير وجمهور كتير وانا شفت حوالي أربعة بيصوروا كلهم لابسين لبس اليونيفورم بتاع مول اركان وانا بلف لقيت حد منهم بيصور قولتله متصورنيش وكان ماشي ورايا بالكاميرا قولتله متصورنيش وحصل تزاحم وعبدالله مشرف الامن وقع علي الأرض لوحده محدش لمسه».

و ثبت من فحص المقطع المرئي المعروض بالنيابة إمساك عاشور للمجني عليه وجذبه من ملابسه فقال : « انا كنت بحاول امسك كاميرا الموبايل علشان امنعه من التصوير وساعتها هو مشي ومحصلش حاجة».

ووجهت النيابة لنجم الاهلي إمام عاشور تهمة التعدي عمداً بالضرب علي المجني عليه عبدالله مصطفي بأن أحدثت به الإصابات الموصوفة بالتقرير الطبي والتي أعجزته عن أشغاله مدة تقل عن عشرين يوماً ، وقررت إخلاء سبيله بكفالة مالية ٥٠٠٠ جنيه.