علق الإعلامي أحمد شوبير، على ردود الافعال بسبب الاحتفال بمناسبة بمولد السيد البدوي.

تحيا مصر، وكتب شوبير عبر حسابه الرسمي"فيس بوك":"‏صباح الفل جميعاً تعليقاً علي ردود الافعال علي حضور مليون شخص او يزيد مولد السيد البدوى أحب بس أوضح باعتبارى طنطاوى جدا إن ده العادي بتاع مولد السيد البدوى من زمان أوى".

وتابع قائلاً:" وإننا من صغرنا كنا بنحتفل بالمولد مع ضيوف من بلاد كتير اوى منهم من دول مجاوره وإن يومين المولد دول هما اهم يومين تقريبا لطنطا كلها لأن كل محلات الحلويات وغيرها تقريباً".

وأردف قائلاً:" بيكون المولد أهم مصدر لها علي مدار السنه كلها مع بعض المناسبات الدينيه الأخرى زي مولد النبي بالمناسبه، كمان كنا بنستني تانى يوم المولد موكب الخليفه ونرمي عليه ورد وكان بيبقي يوم فرح في طنطا".

وأكمل قائلاً:" وكان المنشدين وكبار قراء القرآن الكريم، وعلي رأسهم ابناء محافظة الغربية الشيخ محمود الحصرى والشيخ سيد النقشبندى والشيخ مصطفي اسماعيل، وغيرهم من عظماء التلاوه كلهم كانوا بيجيوا المولد ف طنطا والاكتر من كده ان السفير الامريكى وعدد من السفراء الاوربيين كانوا دايما من أوائل الحضور للمولد كظاهره اجتماعيه واقتصاديه ودينيه جميلة وعلي فكره كنا كطنطاويه بنكون فرحانين جدا بالعدد المليونى اللي بيحضر كل سنه لأن الخير كان بيبقي للمحافظة كلها".

وتابع قائلاً:" والاكتر من ذلك أن الرئيس السادات عليه رحمة الله كان معروف أنه كان بييجى صلاة الفجر احيانا في مسجد السيد البدوى، وده شيئ معلوم للجميع اخيراً اللي مخلي الناس مستغربين المرة دي ان المولد كان توقف لفتره مش قليلة بسبب الاحداث وبعدين الكورونا ".

وأختتم قائلاً:" لما رجع الناس كان واحشها المولد واللمه وحلويات طنطا والشيخ ياسين التهامى واولاده وكرم الطنطاويه المشهود .. آدي كل الحكايه طبعا مع تحفظي علي بعض الحاجات اللي شفناها ودي غريبه تماما علي مولد السيد البدوى بصرف النظر عن رأي البعض في السيد احمد البدوى واختلافهم أو اتفاقهم عليه وكل سنه وانتم جميعا طيبين".