اللي يفكر يقرب من نهر النيل.. لازم يعرف إنه بيقرب من حياة مصر كلها.. تحذير جديد من الرئيس السيسي لإثيوبيا.. النيل خط أحمر، والكلام المرة دي واضح وصريح.

في كلمة قوية من الرئيس عبدالفتاح السيسي، خلال افتتاح "أسبوع القاهرة للمياه"، الرئيس وجّه رسالة مباشرة لإثيوبيا، وقال: "مصر خاضت مفاوضات سد النهضة لمدة 14 سنة... وشافت تعنت واضح من الطرف التاني."

السيسي أكد إن إثيوبيا بتتعامل مع النيل كأنه نهر خاص بيها، مش نهر دولي بيشترك فيه أكتر من دولة، وده ضد القانون الدولي.

ومش بس كده.. إثيوبيا خدت قرارات منفردة، من غير اتفاق قانوني ملزم، وكأنها مش شايفة مصالح دول المصب.. وده أمر مرفوض تمامًا.

الرئيس السيسي قالها بوضوح: "إحنا مش ضد التنمية، بالعكس.. بس مش هنقبل يتفرض علينا أمر واقع يهدد أمن مصر المائي.

وأكد إن مصر اختارت الطريق السياسي والدبلوماسي مش ضعف.. لكن لأننا دولة مسؤولة.

وبنبرة حاسمة، الرئيس دعا المجتمع الدولي إنه يتدخل، قبل ما يحصل تصعيد أكبر، لأن اللي بيحصل دلوقتي بيمس حياة أكتر من 100 مليون مصري بيعتمدوا على النيل.

الرئيس السيسي قالها بصراحة مصر مش هتقف مكتوفة الأيدي، قدام اللي بتعمله إثيوبيا، وأنها هتعمل كل التدابير، لحماية مصالحها وأمنها المائى.