مصر حاليا بتجهز مفاجأة هتغير حركة السياحة عالميا، والمفاجاة دي هتكون من المتحف المصري الكبير واللي الدولة حاليا بتحط النقط الرئيسية والاسياسية لحفل الافتتاح.. ياتري اية هيا المفاجاة دي.. ومصر بتستهدف الوصول بعدد السائحين لكام في الفترة اللي جاية.. خليكم معانا للآخر وهتعرفوا التفاصيل في الفيديو ده

الحكومة المصرية في الوقت الحالي بتشتغل بكل قوة علشان تسخر كل الجهود لتطوير وزيادة حركة السياحة اللي بتيجي مصر من الخارج، خصوصا أن مصر عندها أزمة في تراجع الايرادات الدولارية اللي بتدخل لخزينة الدولة المصرية من قناة السويس واللي تراجعت لأكتر من 60% بسبب الاحداث اللي بتحصل في حركة الملاحة البحرية في البحر الأحمر واللي اثرت علي حركة مرور السفن في القناة.

مصر حاليا عندها خطة للنهوض بقطاع السياحة ومستهدف أنها توصل لحذب 30 مليون سائح وتحقيق 30 مليار دولار إيرادات من القطاع في سنة 2028، وكمان هتزود عدد الغرف الفندقية إلي 500 ألف غرفة فندقية في 2030 علشان تستوعب الحركة الكبيرة اللي متوقع انها تحصل في مصر مع الافتتاحات الآثرية واهمها المتحف المصري الكبير ده غير المشروعات السياحية الجديدة اللي مصر وقعتها مع الشركاء الاجانب زي راس الحكمة وغيرها من المواقع الجديدة اللي هتدخل خريطة الاستثمار السياحي في الايام اللي جاية.

طيب اية المشروع اللي الحكومة بتجهزه لزيادة حركة السياحة الوافدة لمصر ؟.
رئيس مجلس الوزراء  مصطفي مدبولي قال أن مصر حاليا بتستعد لطرح عالمي لتخطيط المنطقة المحيطة بالأهرامات والمتحف المصري الكبير ولحد مطار سفنكس في الشمال ومنطقة دهشور في الجنوب، أنه فعلا عملوا سلسلة اجتماعات ولقاءات للتوصل الي الشكل النهائي للطرح، وده بما يحفظ الاهتمام بمنطقة الأهرامات والمتحف المصري الكبير واللي خلاص الدولة بصدد افتتاحه في الفترة اللي جاية، ده غير الاهتمام وتطوير الخدمات السياحية في المناطق المجاورة للأهرامات والمتحف المصري الكبير .
طيب اية اللي عملته الدولة في منطقة الاهرامات والمتحف المصري الكبير علشان تزود حركة السياحة هناك؟.

الحكومة في فترة ولاية الرئيس عبدالفتاح السيسي الجديدة بدأت تبص لمنطقة الأهرامات نظره جديدة، وشايفة أنها ممكن تكون المنطقة المفضلة واللي السائحين حوالين العالم نفسهم ينزولوا مصر علشان يشوفوا عظمة المصريين القدماء، وفعلا وقعت مع شركة قطاع خاص علشان تطور الخدمات السياحية للزائرين في منطقة هضبة الهرم، وفعلا الشركة عملت شغل كتير في الهرم، وطورت بوابات الدخول والخروج وعملت مناطق مجهزة لاستقبال السائحين واستعانت باتوبيسات كهربائية علشان تنقل السائحين بين الآثار، ده غير أنها عملت متحف وسينما ومنطقة ملاهي للاطفال هناك.

ومن الأهرامات بنروح للمتحف المصري الكبير واللي الدولة فتحت عدد كبير من قاعات العرض لدخول الزائرين ووصل عددهم لـ12 قاعة حاليا، ده غير البهو والدرج العظيم بالمتحف، وده حاجة لاختيار الخدمات السياحية اللي بيقدمها المتحف للزائرين استعدادا لحفل الافتتاح الرسمي للمتحف واللي هيتحدد في الفترة اللي جاية، وكمان الدولة عملت مطار قريب من المنطقة وهو مطار سفنكس الدولي وده لخدمة الوفود السياحية اللي عايزة تنزل علي طول هناك وترجع بعد ما تخلص رحلتها في منطقة الأهرامات والمتحف المصري الكبير .