يا ترى إيه اللي بيحصل في صادرات مصر؟ وليه فجأة بنشوف زيادة ملحوظة في أرقام الصادرات، خصوصًا المواد الخام؟ والأهم.. هل ده ليه تأثير على أزمة نقص العملة الأجنبية اللي مصر بتواجهها؟.. تابع الفيديو للآخر عشان نفهم الصورة كاملة ونشوف إزاي ممكن الأرقام دي تغيّر شكل الاقتصاد المصري

البيانات الرسمية الأخيرة كشفت عن خبر إيجابي جدًا.. وهو ان صادرات مصر من المواد الخام زادت بنسبة 8% في أول 8 شهور من 2024..  وده بيترجم لـزيادة في الإيرادات بحوالي 1.135 مليار دولار مقارنة بنفس الفترة السنة اللي فاتت.. ووصل إجمالي صادرات المواد الخام لـ 3.4 مليار دولار وده رقم مهم جدًا لما نيجي نتكلم عن وضع العملة الأجنبية في السوق المصري

وتعالوا نبص على التفاصيل شوية: 
فيه سلع معينة كانت البطل في المشهد ده.. زي العجائن والمحضرات الغذائية اللي صادراتها زادت بنسبة ضخمة وصلت لـ 28.5%، يعني من حوالي 923 مليون دولار السنة اللي فاتت لـ 1.185 مليار دولار السنة دي.
وكمان الملابس الجاهزة اللي حققت زيادة ملحوظة بنسبة 17.2% وده برقم وصل لـ 1.813 مليار دولار مقارنة بـ 1.547 مليار دولار في نفس الفترة السنة اللي فاتت.

لكن الموضوع مش متوقف عند المواد الخام وبس..الأرقام العامة بتقول إن إجمالي صادرات مصر كلها بما فيها السلع التامة الصنع والوقود زادت بنسبة كويسة جدًا ووصلت لـ 29.8 مليار دولار في أول 8 شهور من 2024،مقارنة بـ 28.8 مليار دولار السنة اللي فاتت.

طب ليه الأرقام دي مهمة؟
أولاً.. لأنها بتعكس تحسن في القدرة التنافسية للمنتجات المصرية في السوق العالمي.. ولما الصادرات تزيد ده معناه إن الطلب على المنتجات دي بره مصر عالي وده بيترجم لإيرادات أكتر من العملة الأجنبية اللي هي واحدة من أهم التحديات اللي بنواجهها دلوقتي

ثانيًا، بتحل أزمة نقص العملة الأجنبية.. الزيادة في الصادرات معناها دخول عملة صعبة أكتر للسوق المصري وده بيخفف الضغط على الجنيه المصري وبيساعد الحكومة في تلبية احتياجاتها من الواردات الضرورية زي السلع الاستراتيجية والطاقة

ثالثًا وده كمان مهم جدا بتخلق فرص عمل جديدة .. لما التصدير يزيد الصناعات المحلية بتشتغل أكتر وده بيخلق وظائف جديدة وبيساهم في تحسين مستوى معيشة المواطن المصري

خلاصة الكلام .. الزيادة دي خطوة إيجابية لكنها مش النهاية إحنا لسه محتاجين نشتغل أكتر على تحسين جودة المنتجات المصرية وتقليل تكاليف الإنتاج وكمان فتح أسواق جديدة لصادراتنا

فالسؤال اللي لازم نسأله دلوقتي: إزاي هنستغل الفرصة دي ونعظم من مكاسبنا؟ لأن التحدي الحقيقي مش في زيادة الأرقام وبس.. لكن في تحويل الزيادة دي لتغيير حقيقي في حياة المواطن المصري