هو إيه حكاية إن أذون وسندات الخزانة بقت في المقدمة تاني كخيار استثماري؟ وليه ناس كتير بدأت تسيب الودائع والشهادات البنكية وتتجه لأدوات الدين الحكومية؟ وهل فعلاً الموضوع ده ليه تأثير كبير على الاقتصاد؟

الوضع اللي شفناه في الشهور الأخيرة عامل ضغط واضح على المدخر المصري.. البنوك خفّضت أسعار الفايدة على الشهادات والودايع بشكل متتابع، والفوايد الاسمية نزلت بشكل ملحوظ، بعض المنتجات وصل فيها الانخفاض بين 5.5% و8% حسب نوع الشهادة ومدتها. ومع التراجع ده، الناس بدأت تدور على بدائل آمنة تحقق عايد أحسن، وده اللي رجّع الأذون والسندات للصورة من جديد.

خلينا نفهم بقى يعني إيه أذون وسندات الخزانة بقت منافس قوي للشهادات؟

أول حاجة.. العائد الحقيقي على أدوات الدين الحكومية لسه مرتفع، وبعد خصم الضريبة اللي 20%، العايد في بعض العطاءات بيتراوح بين 9.5% و15% حسب المدة.

تاني حاجة.. العائد الاسمي اللي أعلنته بعض العطاءات الحديثة بيتراوح بين 25.6% و26.7% لأذون الخزانة، وبين 19.7% و23.4% لسندات الخزانة، وده فرق كبير مقارنة بعوائد البنوك بعد خفض الفايدة.. كمان المحللين بيأكدوا إن العايد على الأذون بعد خصم الضريبة لسه أعلى من أي وعاء ادخاري قصير الأجل، بفارق ممكن يوصل لـ600 أو 700 نقطة أساس في بعض الحالات.

بص على المثال ده: لو معاك مليون جنيه، واستثمرته في سندات خزانة بدل شهادة، ممكن تكسب فرق في العائد يوصل لـ50 ألف جنيه زيادة تقريبًا، وده حسب المدة والعائد العام.

بس مش كل الناس تقدر تدخل السوق ده بسهولة، فيه شوية شروط زي ان الحد الأدنى للاكتتاب في الأذون أو السندات بيكون 25 ألف جنيه للأذن أو السند الواحد.

لازم تكون مكود في البورصة المصرية.. وتروح أحد فروع البنوك المعتمدة للاكتتاب في الأيام المخصصة، ودي بتكون أسبوعية، زي الأحد لعطاءات الأذون قصيرة الأجل، والخميس لعطاءات 6 شهور وسنة، والاتنين لعطاءات السندات الطويلة.

أما عن طريقة الدفع فالعوائد في الأذون بتتصرف غالبًا مقدّم عند الاكتتاب أو بتتخصم من القيمة الأصلية.

أما السندات.. فبتقدر تختار نظام الدفع اللي يناسبك، سواء ربع سنوي أو نصف سنوي أو سنوي، وبتدفع رسوم بسيطة للبنك اللي بيقوم بدور أمين الحفظ.

طب كل ده جميل.. بس إيه تأثيره على الاقتصاد؟

فيه فوايد كتير زي ان الدولة بتقدر تموّل نفسها داخليًا بدل ما تعتمد على القروض الخارجية أو طباعة النقود.. كمان  تحويل المدخرات من البنوك لأذون وسندات بيخفف الضغط على البنوك في موضوع السيولة.. والإقبال الكبير على السندات بيزود استقرار السوق المالي وبيخلق ثقة أكبر في أدوات الدين الحكومية.. وكمان ..العائد العالي نسبيًا بيخليها وسيلة جذب لرؤوس الأموال المحلية، وده ممكن يشجع على استثمارات تانية في الاقتصاد.

بس طبعًا زي أي استثمار فيه شوية تحديات.. فيه ناس ممكن تشوف إن ربط الفلوس لفترة طويلة مش مغري، خصوصًا لو محتاجين السيولة بسرعة.. وفيه كمان مخاطرة إن التضخم يزيد أسرع من العائد الحقيقي، فالقيمة الفعلية تقل بمرور الوقت.. ولو الدولة زودت الاقتراض بشكل مبالغ فيه، ده ممكن يأثر على العوائد المستقبلية.