يا ترى إيه هو خط "الرورو" الجديد اللي اشتغل بين مصر وإيطاليا، هل هيكون خط نقل بحري ولا بري ولا سككي، وليه الحكومة مهتمة به بشكل كبير جدا، وامته هيشتغل.. هنقولك كل التفاصيل في التقرير  ده.

يوم الخميس اللي فات، الدكتور مصطفى مدبولي، رئيس مجلس الوزراء، والفريق مهندس كامل الوزير، نائب رئيس مجلس الوزراء للتنمية الصناعية، وزير الصناعة والنقل، أطلقوا تشغيل خط الرورو بين مصر وإيطاليا، وبالفعل طلعت أول رحلة من مينا دمياط.

وخط الرورو ده، هدفه انه هينقل الصادرات الزراعية بين مصر وإيطاليا من خلال الموانئ البحرية، وهيسهل ويعزز التجارة الدولية، وطبعا المشروع ده اتنفذ بتوجيهات رئيس الجمهورية، بتحويل مصر إلى مركز إقليمي للنقل واللوجستيات وتجارة الترانزيت.

طب إيه هي المكاسب الاقتصادية من خط الرورو؟

أول حاجة، إنه هيساهم في تعزيز قدرة مصر في انها تكون منطقة لوجستية مركزية بين أوروبا وأفريقيا، وكمان هيزود ويعزز الفرص التجارية ويدعم الصادرات المصرية من المنتجات الصناعية والحاصلات الزراعية من خلال تسهيل نفاذ المنتج المصري للأسواق الأوروبية كلها.

كمان، هيساهم في فتح أسواق تصديرية للصادرات المصرية من السلع الزراعية بالسوق الإيطالية والأوروبية، ونقدر نقول إن تشغيل أولى رحلات خط الرورو المصري الإيطالي، هي ثمرة جهود كبيرة من الجانبين المصري والإيطالي، عشان يتم نقل البضائع باستخدام الشاحنات المُبردة والجافة، وإنشاء ممر أخضر بين جمهورية مصر العربية والجمهورية الإيطالية، وده طبعا بيجسد العلاقات المتميزة بين القيادة السياسية والشعبين في البلدين الصديقين.

ضيف على ده، إن الرورو هيعزز الاستفادة من الخبرات الأوروبية في مجال النقل البري، وهيدعم انخفاض تكاليف الشحن وزمن وصول البضائع،  وكمان هيعزز تنافسية المنتج المصري في الأسواق دي ، وهيوفر فرص عمل مباشرة وغير مباشرة للموظفين الإداريين لشركات النقل وشركات الشحن والوكلاء الملاحين، وكمان هيوفر أكتر من 2000 فرصة عمل للسائقين المصريين.

والخط الجديد ده هيتيح وصول سريع للمنتجات إلى جميع المدن الأوروبية، يعني وقت وصول الشحنة بين ميناءى دمياط وتريستا مش هتاخد يومين ونص بس، بعد ما كنت 6 أيام بالطرق التقليدية.    

كمان، الخط ده هيُمكن المنتجات الايطالية والأوروبية من الوصول بسهولة للسوق المصري والسوق الأفريقية والشرق الأوسط ككل، عبر بوابة مصر، كمان هيتيح للسلع المصرية المُصدرة إلى ميناء تريستا الإيطالي الانتشار في كل أنحاء السوق الأوروبية، وهيعزز التعاون في مجال الزراعة والأمن الغذائي بين مصر وإيطاليا.

وكانت OLYMPOS SEAWAYS أول سفينة تشتغل بخط الرورو، واللي طلعت من إيطاليا ووصلت ميناء دمياط يوم الحد الموافق 24 نوفمبر، وكان على متنها 118 حاوية وتريلا نقل ومعدات بإجمالي وزن 743.5 طن (83 حاوية ثلاجة  بإجمالي وزن 415 طن، 33 تريلا نقل بإجمالي وزن 214.5 طن، 2 تريلا نقل على متنها مُستلزمات إنتاج لمصنع ليوني لضفائر السيارات بإجمالي وزن 34 طن، و9 معدات خاصة بمشروع توكيل بان مارين بإجمالي وزن 80 طنا، وتم تفريغها بميناء دمياط.

والسفينة شالت في رحلتها الأولى من دمياط إلى ميناء تريستا (9 حاويات ثلاجات محملة فاكهة وخضراوات، وحاوية 45 محملة ملابس و9 شاحنات محملة فاكهة وخضار، و2 شاحنة محملة ضفائر)، ومفترص توصل يوم الأربع الموافق 4 ديسمبر 2024.

وأخيرا، مواعيد خط الرورو أسبوعيا من ميناء دمياط إلى ميناء تريستا والعكس، هتكون وصول السفينة الساعة 3 العصار يوم الخميس من كل أسبوع إلى ميناء دمياط قادمة من ميناء تريستا، وهتغادر من ميناء دمياط إلى ميناء تريستا مُحملة بالمنتجات المصرية الساعة 10 صباحا يوم الجمعة من كل أسبوع، وهتوصل السفينة إلى ميناء تريستا بإيطاليا الساعة 1٪ صباحاً يوم الاثنين من كل أسبوع ومغادرتها من ميناء تريستا إلى ميناء دمياط الساعة السادسة مساء.