هو ايه اللي بيحصل في منطقة قناة السويس الاقتصادية وايه حكاية مليارات الدولارات اللي استقرت في المنطقة وايه الشكل النهائي للمنطقة الاقتصادية وهتضيف ايه للاقتصاد المصري.. خليكم معانا للآخر وهتعرفوا التفاصيل في الفيديو ده .
 

المنطقة الاقتصادية لقناة السويس بتعتبر علامة مهمة من علامات الجمهورية الجديدة ودليل حي على الانطلاقة الاقتصادية في مصر وواجهة مالية مصرية قدام العالم وبعد ما تخلص اغلب المشروعات اللي فيها هتكون عاصمة مالية لمصر و للمنطقة كمان ودي مش مبالغة لأن اللي بيحصل هناك دلوقتي مش طبيعي وتقدر تقول إن الحكومة بتعمل سنغافورة ولا هونج كونج جديدة في المنطقة.. طيب ليه بنقول كده..

شوف ياسيدي منطقة قناة السويس الاقتصادية هتكون أهم منطقة صناعية في العالم وكل بسبب المميزات اللي بتتمتع بيها زي قربها من قناه السويس وخطوط التجارة العالمية وقربها من كل موانئ أوروبا والشرق الأوسط والخليج العربي كمان وفيه سبب تاني مخلي المنطقة الاقتصادية لقناه السويس موضع اهتمام الشركات العالمية وهي أنها متخصصة في مشروعات الاقتصاد الأخضر بجانب الأنشطة التانية ودا معناه أنها هتجذب نوعية الشركات العالمية اللي شغالة في مشروعات الاقتصاد الأخضر زي الطاقة الكهربائية النظيفة ومشروعات الهيدروجين الاخضر وغيرها...

كمان اقتصادية قناة السويس هتكون من أهم المناطق في العالم اللي بتقدم الخدمات  اللوجستية والموانئ والتعهيد وفيها دلوقتي 164 مشروع سبعة منها في الموانئ والباقي مصانع ومواقع لوجستية داخل المنطقة وبالارقام قدرت المنطقة تجذب  استثمارات عالمية بأكتر من 6.3 مليار دولار في مختلف المجالات ودي مجرد بداية مع أن الرقم ضخم جدا..

الهيئة العامة للمنطقة الاقتصادية لقناة السويس كشفت عن بعض الارقام وقالت إنه تم ضخ استثمارات بحوالي 3 مليار دولار لتطوير وتنمية البنية التحتية خلال السنوات القليلة اللي فاتت ولسه فيه 3 مليار دولار تانية هتيم ضخها لنفس السبب  لجذب المزيد من الاستثمارات العالمية والمحلية.. ودا طبعا هيفتح المجال أن المنطقة تكون تجمع اقتصادي فريد من نوعه وفي نفس الوقت هتكون إضافة قوية جدا للاقتصاد المصري ومصدر ضخم للدخل النقدي الأجنبي وتعظيم قوة مصر الاقتصادية في حوض المتوسط والبحر الأحمر وفي عالم المواني العالمية

وكفاية تعرف إن فيه عدد كبير  من الشركات العالمية بتستعد دلوقتي لضخ استثمارات ضخمة  بمليارات الدولارات في مجالات الهيدروجين الأخضر والصناعة زي ماقلنا في خطوة بتعكس الاهتمام المتزايد بالمنطقة الاقتصادية لقناة السويس كوجهة استراتيجية للاستثمار في المستقبل وكان آخرها توصل جهاز التمثيل التجاري المصري لاتفاقيات مع 10 شركات عالمية من الهند والصين وتركيا والاتحاد الأوروبي وهي شركات ضخمة شغالة ومتخصصة في مجالات الهيدروجين الأخضر والصناعة  للتوسع في الاستثمار الصناعي في مصر.