يا ترى إيه اللي بيحصل في وزارة الصناعة، وهل خلطة نجاح كامل الوزير ظهرت ولا لسه، وهل بدأت الافتتاحات في المشروعات الجديدة ولا لسه شوية كمان، والفريق بيعمل إيه دلوقتي.. هنقولك كل التفاصيل في التقرير ده فتابعنا للآخر.
في الساعات الأخيرة، الفريق مهندس كامل الوزير، نائب رئيس مجلس الوزراء للتنمية الصناعية، وزير الصناعة والنقل، قام بجولة تفقدية في المنطقة الصناعية بمدينة العاشر من رمضان بمحافظة الشرقية، والفريق اتفقد 4 مصانع متخصصة في الصناعات الكهربائية والغزل والنسيج والأدوات الصحية وأجهزة إطفاء الحريق.
كمان، اتفقد الوزير المجمع الصناعي "السويدي بيراميدز" لتنمية المناطق الصناعية ومصنع السويدي للعدادات "اسكرامكو"، وبدأ بمصنع شركة ABB للصناعات الكهربائية، وكان في استقبال الوزير بالمصنع اندرياس باوم السفير السويسري بالقاهرة وهوكان امسجورد السفير السويدي بالقاهرة وكمان أحمد حماد رئيس مجلس ادارة الشركة.
انهاردة بقي تم افتتاح وقص شريط وتفقد خط إنتاج الاكشاك المدمجة والمخصص للتصدير، وتفقد الحضور مصنع محولات الجهد والتيار للضغط العالي، وكمان المنتج النهائي للمحطات المدمجة الخاصة بتوزيع الكهرباء والمخصص للتصدير.
كمان، تم تفقد خط إنتاج الجهد العالي الثانوي، وخط انتاج الجهد العالي الابتدائي (خط إنتاج مخصص بالكامل للتصدير لأسواق الخارجية وبشكل خاص السوق السعودية)، وخطوط إنتاج لوحات الجهد المنخفض.
والمصنع ده تابع لشركة ABB للصناعات الكهربائية، وبرأس مال بيبلغ 800 مليون جنيه وبطاقة إنتاجية تبلغ 240 ألف وحدة سنوياً، وكمان بيوظف 931 عامل، وعشان كده المصنع بيخطط إن 50% من إنتاجه للتصدير لدول المانيا وإيطاليا وانجلترا واليونان والإمارات والسعودية وسلطنة عمان وبعض الدول الافريقية.
كمان، تم التنسيق مع شركة ABB للصناعات الكهربائية لتخصيص مركز تدريب من مراكز مصلحة الكفاية الإنتاجية والتدريب المهني التابعة للوزارة عشان تكون تحت إشراف الشركة لتطوير المناهج وتخريج خريجين على أعلى مستوى من الحرفية عشان تلبي احتياجات مصانع الشركة.
وبجانب ده، الوزير وجه بتوفير اتوبيسات لنقل العاملين من المصنع إلى محطات القطار الكهربائى الخفيف "LRT" لتيسير انتقال العمالة من وإلى مقر عملهم، بوسائل مواصلات أكتر أمناً وراحة، وكل ده بالتأكيد بيساهم في زيادة معدلات الإنتاجية.
كمان، وزير الصناعة أكد أن هيتم رفع كفاءة الطرق والمرافق، زي غاز ومياه وصرف وكهرباء في المناطق الصناعية زي ما حصل في مدينة العاشر من رمضان.
بعد كل ده، الوزير اتفقد مصانع مجموعة النساجون الشرقيون الرائدة في صناعة الغزل والنسيج، حيث وشاهد الهرم الزجاجي اللي مصنوع من النول، وكمان مصنع الخيوط 1، ومصنع CRM للسجاد، بالإضافة للمخزن المطور.
وطبعا كلنا عارفين، إن مجموعة النساجون الشرقيون من أكبر الشركات العالمية في تصنيع المنسوجات والسجاد، وبتتجاوز مساحة مصانع المجموعة مليون متر مربع، وطاقتها الإنتاجية حوالي 150 مليون متر مربع سنوياً، وبتوظف الشركة أكثر من 19 ألف عامل، وبتخصص نحو 65% من إنتاجها للتصدير.
ومن ضمن جدول الجولة، كان مصنع الشركة العالمية للأدوات الصحية "جواد"، فبدأ الوزير جولته بالمصنع واتفقد خط تصميم الاسطمبات، وخط تشغيل الخراطة والقلاوظ CNC، وخط الصنفرة والتلميع، وخط المسبك المعدني، بعدين تم افتتاح وقص الشريط وتفقد خط الطلاء الكهربي الحديث، في المصنع اللي بيقام على مساحة 11899 متر مربع، وبطاقة إنتاجية تبلغ 1,25 مليون قطعة سنوياً، وبيوفر 150 فرصة عمل.
كمان، الوزير اتفقد مجمع بافاريا الصناعي المتخصص في إنتاج مكونات الحريق وصناديق جمع المخلفات بمختلف سعاتها من المبلمرات الهندسية للتجميع بالمدن الكبيرة عشان يتم استخدامها في اعادة التدوير، وكمان إنتاج كبائن الإطفاء والمواسير المعدنية الملحومة في إنتاج دواليب إطفاء الحريق بمختلف مقاساتها والمقام على مساحة 36 ألف متر مربع، والمصنع ده بيبلغ عدد عماله 856 عامل وحجم مبيعاته السنوية حوالي 2.5 مليار جنيه.
والجولة شملت كمان تفقد مصنع إنتاج صناديق المخلفات البلاستيك عن طريق الحقن، وخط إنتاج مواسير الصاج الملحوم، وخط إنتاج الكبائن الصاج والاستانلس ستيل ومعالجة الاسطح، وتم تفقد المخازن الالية للمنتجات والمكونات، ومصنع بافاريا دلتا لإنتاج مواسير تغذية مياه الشرب ومشتملاتها.
ومن هنا، وجه الوزير بأن لازم تكون مستلزمات الوحدات المتحركة بخطوط المترو من المنتجات الكهربائية ولوحات التحكم ومعدات ومكونات الدفاع المدني والإطفاء محلية الصنع.
أما زيارة المجمع الصناعي "السويدي بيراميدز" لتنمية المناطق الصناعية، واللي بيقع على مساحة مليون متر مربع، فشملت تفقد منطقة صناعية فيها 45 منشأة صناعية شغالة في صناعات متعددة على مساحة 500 ألف متر مربع، ومنطقة لوجيستية وتجارية على مساحة 250 ألف متر مربع، وزار الوزير مصنع السويدي للعدادات "اسكرامكو" واللي مساحته 50 ألف متر، وبيوظف 500 فرد، وبتبلغ طاقته الإنتاجية 3 مليون عداد، وبيصدر 50% من الانتاج للخارج.
فمن الواضح إن الفريق كامل الوزير مش هيبطل افتتاحات في ملف الصناعة، وده خاصة بعد ما حقق إنجازات كبيرة جدا في ملف النقل، والأيام الجاية هتبقى كلها افتتاحات صناعية هتوفر ملايين للبلد وهتغنينا عن الاستيراد من الخارج، وكمان هتوفر عملة صعبة للبلد.. يعني هنصنع الدولار جوه مصر زي ما قال الوزير.
