إيه هو مشروع «ERP» اللي بتنفذه الحكومة دلوقتي، وفي أي قطاع من القطاعات، وليه أوكلت ليه وزارة قطاع الأعمال، وخلال قترة قد إيه المشروع ده هيبقي موجود، وايه هي وجه الاستفادة منه.. هنقولك كل التفاصيل في التقرير ده.

في الساعات الأخيرة، كشف وزير قطاع الأعمال العام، المهندس محمد شيمي، الستار عن مشروع «ERP»، وقال إن تم الاتفاق مع وزارة الاتصالات وتكنولوجيا المعلومات، على وضع جدول زمنى محكم لتنفيذه، وهو عبارة عن تطبيق نظام تخطيط موارد المؤسسات في الشركات التابعة لوزارة قطاع الأعمال العام، عشان توفر أعباء مالية كتيرة وتدخل عوائد أكتر.

عشان كده، تم تشكيل فرق عمل مشتركة من وزارة قطاع الأعمال والاتصالات عشان يتابع سير العمل وضمان تنفيذ المشروع وفق الخطط المحددة، كل ده مع وجود تكليفات بسريع الخطوات التنفيذية للمشروع.

كمان وزير قطاع الأعمال وكمان وزير الاتصالات، ناقشوا سبل تسريع تنفيذ النظام اللي بيهدف لتحسين وميكنة نظم العمل في المشروعات الجديدة، واللي من ضمنها تطبيق نظام "ERP"، اللي هيكون خطوة محورية في استراتيجية الوزارة لتطوير وتحديث الشركات التابعة.

والنظام الجديد ده هيساهم في تحسين عملية اتخاذ القرارات المعتمدة على بيانات دقيقة وآنية، بجانب تعزيز الأداء الإداري، وترسيخ مبادئ الحوكمة، وتقليل التكاليف التشغيلية، وكل ده هيعزز من القدرة التنافسية للشركات فى السوق، وبالتالي المنافسة كمان في تحقيق الأرباح انعاش الاقتصاد الجزئي والكلي كمان.

كمان تطبيق نظام "ERP" فى شركات قطاع الأعمال العام بيجي فى إطار الجهود المبذولة لتحقيق التحول الرقمي وتطبيق أحدث التقنيات فى مختلف قطاعات الدولة؛ عشان كده وزارة الاتصالات وتكنولوجيا المعلومات على أتم الاستعداد لتقديم الدعم التقنى اللازم، وكمان كل الحلول المبتكرة والمتطورة للتغلب على التحديات اللي ممكن تواجه عملية التنفيذ.

ونقدر نقول إن في اهتمام كبير من الحكومة بالإسراع فى تنفيذ النظام لتعزيز قدرات الشركات على إدارة مواردها بشكل أكثر فعالية وشفافية، ومواكبة التحولات الرقمية التى تشهدها كافة مؤسسات الدولة، وده هيحصل جبنا إلى جنب مع تدريب وتأهيل الكوادر البشرية فى الشركات التابعة لضمان الاستخدام الأمثل للنظام الجديد ده.

وفي سياق متصل، امبارح افتتح  وزير قطاع الأعمال العام، نيابة عن الدكتور مصطفى مدبولي رئيس مجلس الوزراء، فعاليات الأسبوع الكويتي الـ 15 في مصر، واللي بتنطمه السفارة الكويتية بالقاهرة بالتعاون مع مجموعة الجابرية للمعارض الكويتية، تحت شعار "الكويت في مصر".

والافتتاح ده حضره مجموعة كبيرة من المسئولين في مصر والكويت، وكمان رؤساء كبار الشركاء، ومنهم الدكتور شريف فاروق وزير التموين والتجارة الداخلية، والدكتور إبراهيم صابر محافظ القاهرة، ومن الجانب الكويتي السفير غانم صقر الغانم سفير دولة الكويت لدى جمهورية مصر العربية، وممثلي وزارات الدفاع والإعلام والهيئة العامة للأوقاف والهيئة العامة للصناعة وكبرى الشركات العاملة بمختلف المجالات بدولة الكويت، ورئيس مجموعة الجابرية للمعارض أحمد إسماعيل بهبهانى، بالإضافة إلى حضور عدد من السفراء والدبلوماسيين العرب وكبار الشخصيات.

وبيشارك في المعرض اللي مدته 3 أيام، أكتر من 80 جهة وشركة مصرية وكويتية في قطاعات متنوعة، زي وزارات مصرية (الصحة والسكان، البترول والثروة المعدنية، العمل ، السياحة والآثار، الطيران المدني) ومحافظة القاهرة، وعدد من الوزارات الكويتية.

ومن هنل، أكد المهندس محمد شيمي أن الأسبوع الكويتي في مصر هو من أكبر التجمعات المصرية الكويتية التي تسهم في تدعيم أواصر الترابط بين البلدين الشقيقين

وأكد كمان، إن دورية انعقاد هذا الحدث السنوي على مدار  15 عاماً بتعكس عمق العلاقات التاريخية الأخوية والراسخة بين مصر والكويت والحرص على تعزيز التعاون المشترك في مختلف المجالات خاصة الاقتصادية والتجارية والاستثمارية، في ظل ما تشهده الدولة المصرية  تحت قيادة الرئيس عبد الفتاح السيسي رئيس الجمهورية، من طفرة تنموية وانجازات غير مسبوقة في الجمهورية الجديدة.