مع كل فرصة لإقامة سوق للسيارات المستعملة، الآلاف من المصريين بيستغلوها كويس، وبيروحوا يدورا على عربية حالتها كويسة وتسد معاهم وكمان تكلفتها على قد الإيد.

ولأن سعر العربيات الزيرو بقت فلكية اليومين دول، فالحل بالنسبة لناس كتير بيكون في المستعمل، سعر حنين وعربية تسد الاحتياجات وترحمنا من زحمة المواصلات.

عشام كده، سوق المستعمل دلوقتي بيشهد حالة من الاستقرار في الأسعار، لعدد كبير من الأنواع، وبتتنوع أسعارها وفق النوع والموديل.

يعني مثلا عربية جيب شيروكي موديل 1994 مستعملة، عداد 350 ألف كيلومتر، لون أسود، ناقل حركة مانيوال، بها تكيف وزجاج كهربائي، سعرها 200 ألف جنيه، ودي أقل حاجة كويسة.

أما سيارة رينو ميجان موديل 1999 مستعملة، عداد 433 ألف كيلومتر، لون ذهبي، ناقل حركة مانيوال، بها تكيف وزجاج كهربائي، فسعرها 155 ألف جنيه.

نيجي لعربية دايو نوبيرا 1 موديل 1997 مستعملة، عداد 210 آلاف كيلومتر، لون أبيض، ناقل حركة مانيوال، فيها تكيف وزجاج كهربائي ومرايات كهربائية، فالسعر هنا بيوصل ل200 ألف جنيه.

أما أوبل كورسا موديل 1998 مستعملة، عداد 250 ألف كيلومتر، لون أزرق داكن، ناقل حركة مانيوال، فيها تكيف وزجاج كهربائي، فسعرها 165 ألف جنيه.

وسيارة إسبيرانزا A113 موديل 2009 مستعملة، عداد 161 ألف كيلومتر، لون أحمر، ناقل حركة مانيوال، فيها تكيف وزجاج كهربائي، فسعرها 150 ألف جنيه.

وقبل ما تشتري المستعمل، هنقولك شوية نصايح عشان تضمن عملية شراء سليمة وفلوسك ماتضعش، أولها إنك لازم تجمع معلومات عن العربية اللي انت ناوي تشتريها كويس، ويفضل تاخد معاك حد فاهم في العربات عشان يتأكد من جودتها ويختبرها كويس، ولو عجبتك العربية وطلعت مناسبة ليك ماتنساش تعمل عقد رسمي بعملية البيع والشراء ويكون موثق في الجهات الحكومية وده عشان تضمن حقك.

وياريت تشتري من مكان معروف ومضمون وسمعته كويسة، وماتنساش توثق أوراق العربية أول بأول، عشان تضمن حقك وفلوسك في نفس الوقت، ومايتنصبش عليك.