فاكرين لما كنا بنقول عايزين نكسر أرقامنا القياسية في التصدير؟ طب لو قلتلك إننا مش بس كسرناها إحنا كمان بنجهز الأرضية لأرقام أكبر وأضخم.. عارفين صادرات مصر غير البترولية وصلت كام في 10 شهور؟ طب عارفين الرقم اللي تحقق ممكن يوصلنا لفين وازاى ممكن يكون ليه دور فى حل أزمة نقص العملة الأجنبية؟

فى 10 شهور بس صادرات مصر غير البترولية سجلت 33.35 مليار دولار 33.35 مليار دولار..  أيوة 33 مليار وكسور وفي 10 شهور بس طيب.. السؤال هنا: إزاي؟ وهل الرقم ده بداية لانطلاقة أكبر ولا مجرد طفرة؟

الصادرات المصرية غير البترولية شغّالة كويس جدا السنة دي وبنسبة نمو 12.2% مقارنة بالسنة اللي فاتت.

أرقام زي دي مش بتطلع من فراغ ووراها شغل واستراتيجيات والحكومة مش بتسيب حاجة للصدفة.. عصام النجار، رئيس هيئة الرقابة على الصادرات والواردات صرّح وقال إن الرقم ده دليل على استمرارية النمو الإيجابي والموضوع هنا مش تصريحات مسئولين وخلاص الأرقام هي اللي بتتكلم وبتقول هل احنا بنتقدم ولا واقفين مكانا ولا حتى بنتراجع

في سبتمبر اللي فات كنا بنحتفل بوصول الصادرات لـ29.7 مليار دولار بعدها بشهر واحد بس زوّدنا حوالي 3.6 مليار دولار على الرقم ده.. ودي علامة على إننا ماشيين بخطى ثابتة

يس السؤال هل ده معناه إننا خلاص بقينا في منطقة الأمان؟

لا طبعا كل دي محاولات كويسة لحل أزمة الدولار وزيادة عوايدنا من العملة الصعبة.. والحكومة من ناحيتها مش مستنية ولا واقفة تتفرج و خصصت 23 مليار جنيه لدعم المصدرين من كل القطاعات.. من الصناعات النسيجية لحد الكيماويات والأسمدة ومن الحاصلات الزراعية للصناعات الهندسية.. والدعم ده معمول علشان الشركات تصدّر أكتر وتفتح أسواق جديدة

طب  هل الفلوس دي بتكفي علشان نوصل للأهداف اللي بنتكلم عنها؟

إحنا مش بنتكلم عن أرقام صغيرة هنا الطموح كبير جدًا 145 مليار دولار عوائد تصديرية بحلول 2030 حلم زي ده محتاج شغل دعم وتخطيط لكل خطوة لكن برضه لازم نفكر لو وصلنا للرقم ده إيه هيكون شكله على الاقتصاد؟ وهل هيغيّر حياتنا اليومية؟

المءشرات الموجودة إيجابية ومبشّرة لكن مش معناها إن الطريق مفروش بالورود فيه تحديات منها المنافسة العالمية وتكاليف الإنتاج وكمان متطلبات الأسواق الدولية.وده بيخلينا نفكر ونسأل نفسنا هل إحنا جاهزين نصنع علامة تجارية بتحمل شعار  "صنع في مصر" اللي تقدر تنافس في أي مكان في العالم ولا احنا لسه قدامنا شغل كتير لأن خد بالك المنافسة مش سهلة أبدا