فجر جمال علام رئيس اتحاد الكرة السابق، العديد من المفاجآت حول كواليس الفترة التي قضاها على سدة الجبلاية حول انتماؤه وصدامه مع كبار الأندية.
قال جمال علام عبر تصريحات تليفزيونية، أنا سايب اتحاد الكرة وانا عامل له وديعه في البنك بـ 101 مليون جنيه مصري ووديعه بـ مليون ونص دولار بردو.
وتابع جمال علام: “إحنا مطلوب مننا نحب بعض مش عايزين اكتر من كده الفتره الجاية والإنسان القوي لا بالصوت ولا بالرد بسرعة والإنسان القوي اللي بيقدر يمسك نفسه وقت الغضب وإحنا وصلنا لمرحله صعبة جدا والناس بقوا يتكلموا علي بعض ومش بيحبوا بعض”.
وعن أحقية هاني أبو ريدة لـ تولي رئاسة اتحاد الكرة قال: “أكيد طبعا ومشوفناش حد اترشح غيره أصلا”.
وعن اتهام اتحاد الكرة بأن رحيل البرتغالي فيتور بيريرا عن رئاسة لجنة الحكام كان بسبب ضغوط نادي الزمالك وجماهير الزمالك قال: رحيل بيريرا عن رئاسة لجنة الحكام مكنش له أي علاقة خالص بغضب نادي الزمالك او جمهوره من التحكيم وبيريرا مشي عشان عقده كان انتهى خلاص.
وعن إعادة مباراة مصر والسنغال في النهائي قال: “الشكوى اللي عملناها كان فيها حاجات قانونية زي .. الإرهــ….-..ـــاب اللي حصل في المباراة والوضع كان صعبا جدا زي الليزر وتأخير الأتوبيس وتأخير الفريق لنزول الأرض وعملنا تقرير وبعتناه”.
وأضاف جمال علام: “كان الرأي العام إن البرتغالي روي فيتوريا لازم يمشي من المنتخب بعد النتائج السلبية اللي حصلت معاه في المنتخب”.
وعن رحيل واستقالة اتحاد الكرة قال جمال علام: “لا ده كان رأيي عام عشان المنتخب خسر كأس أمم إفريقيا والنتائج كانت سلبية في المنتخب وساعتها احنا مشينا فيتوريا المسئول عن النتائج دي”.
وعن الاتهامات التي طالت اتحاد الكرة بتطفيش كيروش من تدريب المنتخب قال جمال علام : والله ما حصل الكلام ده كل اللي حصل لما كلمته بعد البطولة قالي انا والدي تعبان ومش هقدر آجي دلوقتي، كلمته بعدها لاقيته بيقولي انا عندي هنا مراتي ووالدي وأهلي لازم آخد رأيهم في موضوع الرجوع ده عشان ليهم بردو حقوق عليا، لكن محصلش خالص اني كلمته مكالمه غير لطيفه ده أمر محصلش”.
ورد جمال علام عن انتمائه أهلاوي ولا زملكاوي، وقال: “مش هتصدقني لو قولت ليك انا معنديش ميول للأندية ولكن ميولي دلوقتي لكل لاعب محترف مصري خارج البلاد وده شرف كبير للبلد ومقدرش انكر اني زملكاوي وبشجع الزمالك”.
ووجه جمال علام رسالة لـ جماهير الأهلي: “انتوا جمهور كبير وعندكم نادي كبير وعظيم وسواء نظم البطولة أو لا هو قادر علي الفوز بالبطولة ومحدش مننا في الاتحاد كان متعمدا يخفي جواب أو الكلام ده كله غير صحيح والنهارده بنتشرف إن الأهلي وصل لمرحلة كبيره جدا في الكرة الإفريقية والعالمية”.
واختتم جمال علام حديثه قائلا: “راضي جدا عن الفترة وكفاية المنتخب الأول ماشي كويس أهو في تصفيات أمم إفريقيا وكأس العالم”.