عبر حسام المندوه أمين صندوق نادي الزمالك، عن حزنه بسبب الظروف السيئة التي تمر بها القلعة البيضاء، نتيجة الأزمة المالية.

تصريحات حسام المندوه

قال حسام المندوه: “اللي شجعني أعمل المداخلة دي يا كابتن مهيب، اللقاء اللي شُفته ليك واتكلمت فيه عن مشكلة نادي الزمالك، وفعلاً المشكلة دي حقيقية جدًا”.

وتابع عبر برنامج اللعيب: “الأمر تجاوز فكرة إن فريق يكسب أو يخسر، إحنا بنتكلم في موضوع يؤدي لانهيار النادي بشكل حقيقي، الناس بتقول مش للدرجة دي، لا للدرجة دي ونص”.

وأضاف: “نادي الزمالك لما مسكناه كان مريض، دلوقتي المريض بيموت، كان في العناية المركزة، ودلوقتي بيموت المريض، واللي بيحصل مش طبيعي خالص”.

وواصل: “أنا مش عايز أدخل في تفاصيل كتيرة، لكن خلاصة كلامي إن كان عندنا أمل في نادي الزمالك، وكل فكرنا كرجال اقتصاد واستثمار إننا نستثمر في أصول نادي الزمالك، وأهم أصل هو نادي الزمالك في 6 أكتوبر”.

وزاد: “إحنا بنتعاقب على حاجة مالناش ذنب فيها، إحنا مش مذنبين، ومنذ تولينا المسؤولية في آخر 2023 اشتغلنا إزاي نحرك عجلة الاستثمار في أكتوبر عشان نبني النادي، لأن المساحة دي مستحيل تتبني بشكل طبيعي من غير استثمار”.

وأوضح: “القانون الجديد للرياضة بيشجع الاستثمار، لأن الدولة والقيادة السياسية عارفة إن الرياضة من غير استثمار مفيهاش استدامة، وخليني أتكلم بصراحة، الزمالك بيمر بأزمة غير طبيعية، ومن أول يوم دخلنا النادي والوضع صعب، دلوقتي الوضع بقى كارثي بكل المقاييس”.

حسام المندوه أمين صندوق الزمالك

وذكر: “لا نتمنى وصول الزمالك لمرحلة الإفلاس طبعًا، بس الواقع صعب جدًا، النادي دلوقتي عايش بجمهوره وببعض الحلول المؤقتة يوم بيوم، وعدم رجوع أرض نادي الزمالك في أكتوبر خطر شديد جدًا على مستقبل النادي، وعلى المنتخبات، وعلى الكرة المصرية كلها”.

وأشار: “كل الناس بتسأل هو مجلس الإدارة مدفعش، بالعكس، المجلس وأعضاء كتير ومحبين الزمالك قدموا قروض وتبرعات غير مستردة بمبالغ كبيرة جدًا، واللي بيحصل دلوقتي إننا بنحل الأزمات يوم بيوم وساعة بساعة، لكن مفيش حلول تضمن استدامة حقيقية للمستقبل”.

وأكمل: “إحنا في المجلس رجال أعمال فكرنا ندعم النادي بفلوس في وقت معين، وبعد كده نستثمر، وفعلاً استثمرنا في أرض أكتوبر، لكن حصلت المشكلة اللي كل الناس عارفاها دلوقتي، والدعم المالي موجود، والتبرعات والقروض اللي قدمناها غير مستردة ومبالغها كبيرة جدًا”.

وتطريق في الحديث: “أحب أبارك للشعب المصري على الصعود لكأس العالم، وبحيي الكابتن حسام حسن وإبراهيم حسن، وطبعًا سيادة الرئيس عبدالفتاح السيسي على الدعم الكبير”.

وأتم: “امبارح كنت في زيارة للكابتن حسن شحاتة، وبدعيله يقوم بالسلامة إن شاء الله، وقابلت هناك كابتن أحمد سليمان وكابتن فاروق جعفر وكابتن خواجة، والزملكاوية دايمًا بيقفوا مع بعض في الأزمات، وبأكد أنه فيريرا مكطمل معانا إن شاء الله”.