تحدث الفنان محمد هنيدي عن الأزمة التي يعاني منها المجتمع المصري بسبب التيك توكرز والأشياء التي أصبح يهتم بها الجمهور على التيك توك، والتي أدت إلى انحدار الذوق العام وأثر على الأجيال الجديدة بشكل كبير جدا.

محمد هنيدي: المحتوى اللي فيه إيحاءات وشتيمة بقى بيعجب ناس كتير 

وقال محمد هنيدي: المشكلة مش الذوق العام ولا فكرة تدخل الدولة، المشكلة أعمق بكتير، وهي إن نوع معين من المحتوى "الشعبوي"، اللي فيه حوار شعبي، شوية شتيمة، شوية إيحاءات جنسية، بقى بيعجب شرائح كبيرة جدًا من الناس، بصراحة حتى إحنا ممكن نوقف ونتفرج كفضول.

وتابع محمد هنيدي حديثه، قائلا: الناس دي بقت مصدر جذب أكتر من السينما والتليفزيون، ومع كل لايك ومشاهدة بيطلع ناس تانية تسيب شغلها وتقول أنا كمان هعمل ده، في الأول بيبدأ لايف بسيط، ومع الوقت ومع قلة الفلوس الناس دي تبدأ تزود في الانحدار علشان تجيب مشاهدات، والكارثة.. الجمهور موجود. 

محمد هنيدي: 70% من الناس عارفين التيك توكرز وبقوا نجوم وبيتكرموا

واستكمل هنيدي حديثه: تيك توك بقى المنصة الأولى في الشرق الأوسط ومصر، لو نزلت مول هتلاقي 70% من الناس عارفين التيكتوكرز واحد واحد، بقى عندنا نجوم بيعملوا إعلانات، وبيتكرموا، وبيتصوروا في كل مهرجان، النتيجة؟ العقل الجمعي للمجتمع بيتغيّر، الجيل الجديد بقى شايف إن ده هو "الصح"، وده هو النجاح. 

واختتم محمد هنيدي: ناس كتير، رغم إنها مش قادرة تعمل زيه، لكن بتحس بإحباط، واحد بيشقى 12 ساعة والتاني بيشتم أهله وبيقول لفظ خارج بيكسب أكتر منه بـ 10 مرات، أنا مش مع المنع، بس صعب ننفي إن في خلل كبير، خلل بيمسّ العقول، والوعي، وشكل المجتمع نفسه، التأثير حقيقي، وخطر جدًا على أجيال كاملة. 

أخر أعمال محمد هنيدي

من ناحية أخرى، كانت أخر أعمال محمد هنيدي مسلسل شهادة معاملة أطفال من بطولة محمد هنيدي إلى جانب كلا من محمود حافظ، نهى عابدين، جيهان خليل، صبرى فواز، سما إبراهيم، تامر فرج، علاء مرسي، خالد أنور، وليد فواز، وغيرهم من الفنانين، وهو من تأليف محمد سليمان عبد المالك وإخراج سامح عبد العزيز وإنتاج شركة united studios.