كشف الإعلامي أحمد شوبير، عن آخر تطورات مصير تمديد عقد إمام عاشور مع الأهلي، وحقيقة ما تردد خلال الساعات الأخيرة حول عودة اللاعب للزمالك مستقبلًا.

وقال شوبير في تصريحات إذاعية عبر برنامجه «مع شوبير»، المُذاع عبر «أون سبورت إف أم»: «أنا اتكلمت إمبارح مع إمام عاشور عشان أعرف إيه حقيقة حالة الجدل المُثارة حول اللاعب في الفترة الأخيرة، مبدئيًا سألته عن أخبار إصابته وموعد عودته للتدريبات الجماعية، قالي قدامه زي 10 أيام وينزل التدريبات من غير التحام يعني اللاعب قدامه زي أسبوعين كمان عشان يشارك مع الأهلي».

إمام عاشور ينفي وجود أزمة بشأن تمديد عقده مع الأهلي

وأضاف شوبير: «سألته عن اللي بيتردد عن المبالغ المالية اللي هو طالبها عشان يجدد عقده والـ100 مليون وكل الكلام ده، قالي يا كابتن والله ما حصل والناس في النادي محترمين وقالولي يا إمام عاوزين نجدد، ولسة في عقدي 3 مواسم قولتلهم معنديش مشكلة».

وأردف شوبير: «إمام قالي المفترض إنني بتعامل فئة أولى ومع دخول تريزيجيه وزيزو، الفئة الأولى دي زادت، وأنا مش زعلان طبعا والجمهور بيعاملني أحسن معاملة، لكن أكيد مستني أكون ضمن الفئة الأولى والكلام لسة رايح جاي».

إمام عاشور يكشف موقفه من الرحيل عن الأهلي.. والانتقال إلى الزمالك

وأوضح شوبير: «سألت إمام عن حقيقة رغبته في الرحيل عن الزمالك، قالي أنا مرتاح جدا في النادي الأهلي وكل الكلام اللي بيتردد ده مش صح، وعاوزين نرجع بطولة أفريقيا لإننا كنا زعلانين جدا لما خسرناها الموسم اللي فات».

واختتم شوبير حديثه قائلًا: «الأرقام اللي اتقالت دي كلها غير صحيحة، والمجمل بالنسبالي أنا سعيد ومبسوط».