تحدث نجم النادي الأهلي محمد مجدي أفشة، صاحب هدف “القاضية ممكن”، عن كواليس نهائي القرن أمام الزمالك، والفوز باللقب الإفريقي الأغلي في تاريخ النادي، ويستعرض موقع تحيا مصر أبرز ما جاء على لسان أفشة.
تصريحات محمد مجدي أفشة
قال أفشة: “أول ما خلصت الماتش طلعت على البلد على طول ، ملحقتش اوصل للبيت لقيت البلد كلها في الشارع ، روحت ناطط من العربية وخدت ابويا وعمي بالحضن ، وشالوني من اول البلد لحد البيت ، الفرحة اللي زي دي مبتحصلش كتير ، وهي تبقي فرحة واحدة في العُمر”.
وتابع عبر موقع النادي الأهلي: “كنت متوقع ان الكرة هتترد ليا لما السولية لعبها جوا منطقة جزاء الزمالك وانها هتجيلي وكنت واخد قرار اني اسبق لاعب الزمالك ، وكنت واخد قرار اني استلم واشوط، ولما سجلت الهدف مفكرتش في اي حاجه حتى الاحتفال محتفلتش غير بعد الماتش”.
وواصل: "لما دخل فينا هدف التعادل وخرجنا بين الشوطين ، كان كله ساكت ومحدش اتكلم غير سعد سمير وقال للفريق "احنا لازم نتعب علشان نكسب احنا مش كويسين، وسعد جالي وقالي انت لازم تبقي فايق اكتر من كدا وانت اللي هتفرق معانا لو انت كويس".
كواليس هدف قاضية نهائي القرن
وأكمل: “لما صحينا من النوم يوم نهائي القرن مكنتش مصدق ان النهاردة الماتش ، وقولت لنفسي طب يارب هنعمل ايه، طب يارب نكسب علشان نفرح الناس.. في اليوم دا احمد الشيخ جالي وقالي انا صليت الفجر وحاسس انك هتجيب الجول ، قولتله نفسي”.
ذكر: “يوم 27 نوفمبر كان يوم جميل ومش ليا لوحدي من أحسن ايام حياتنا، انك تفرح شعب جماهير الاهلي ، دي كبيرة جداً معتقدش ان حد في يوم من الايام كان يتوقع كدا لان دي حاجه من عند ربنا”.
وأضاف: “احساس انك تاخد البطولة وتجيب أهم هدف في التاريخ ، دي حاجه تديلك ثقة كبيرة ، قبل الهدف كنت حاجه وبعد الهدف كنت حاجه ، الهدف دا غير كتير من حياتي ، والتغيير دا ياما تستغله في حاجه صح او غلط والحمدلله استغليته صح”.
وأوضح: “دايما بقول لنفسي ان شخصتي مختلفه وعندي طموح واصرار ، اني اجيب هدف زي دا واكمل الفترة دي كلها مش سهلة لازم تبقي قنوع ان لو وقفت عند الجول دا يبقي معملتش حاجه غيره، ولازم تكمل وتتعب وهيجي وقت عليك مش هتبقي كويس”.
وأتم أفشة حديثه: “لما ابني يكبر هقوله ابوك جاب أهم جون في تاريخ النادي الأهلي، وده هيفضل مصدر فخر ليا طول حياتي”.
0 تعليق