في دول كتيرة حوالين العالم، اقتصادها قايم علي قطاع السياحة، ومصر حاليا بتحاول تكرر الفكرة دي.. وفي شغل كتير قوي بيحصل في القطاع ده علشان يكون الاساس اللي مصر هتنبي عليه النهضة الاقتصادية بتاعتها.. ياتري مصر عملت اية في النقطة دي.. ومصر مستهدفة تحقق كام من قطاع السياحة.  خليكم معانا للآخر وهتعرفوا التفاصيل في التقرير  ده.

قطاع السياحة واحد من اهم القطاعات الدولارية في مصر، بعد إيرادات التصدير وتحويلات المصريين وبعدها الاستثمارات الأجنبية المباشرة وأخيرا قناة السويس واللي هيا كانت المصدر الاول للدخل الدولاري لمصر من الخارج، ولكن الاحداث الاخيرة اللي موجودة في منطقة البحر الأحمر اثرت بشكل كبير علي ايرادات القناة وللاسف الدخل الدولاري للقناة تراجع باكثر من 60% من الارقام الليي كانت مصر بتحققها قبل كده.

طيب اية اللي مصر بتعمله في قطاع السياحة علشان تكون هو اساس النهضة السياحية في مصر؟.
مصر من فترات طويلة وهيا بتحضر قطاع السياحة علشان يكون القطارة اللي بتجر الاقتصاد المصري لبر الأمان، ودي كانت تعليمات الرئيس السيسي.. والبداية كانت من تجهزي الخدمات السياحية لاستقبال السائحين في المناطق الأثرية، خصوصا أن مصر كانت عندها مشاكل كبيرة جدا في النقطة دي واغلب المناطق الآثرية في مصر كان مفهاش مكان ادمي لاستقبال السائحين ولا خدمات كويسة للزائر اللي جاي مصر من برا، لكن مصر لجأت لفكرة كسبت فيها من الاتجاهين والفكرة دي هيا اسناد تجهيز الخدمات السياحية بالمناطق الآثرية بالتعاون مع القطاع الخاص، والبنود بتاع الاتفاق بتنص علي قيام الشركات السياحية بتجهيز البنية التحتية والتجهيزات اللي هيحتاجها السائح وقت زيارته للمنطقة الآثرية من دورات مياة ومطاعم ووسائل انتقالات سواء كانت عربيات جولف كار أو اتوبيسات كهربائية ده غير توفير البازارات اللي السائح هيشتري منها الهدايا اللي هيحتاجها .

بداية تطبيق الفكرة دي كانت في منطقة الأهرامات الأثرية، وبعدني الوزارة كررتها في المتحف المصري الكبير اللي شغال بشكل تجريبي حاليا، وكمان اطبقت في منطقة القلعة وقصر البارون والمتحف القومي للحضارة وغيرها من المناطق الأثرية علي مستوي محافظات الجمهورية ، وهنا الدولة ضربت عصفورين بحجر واحد الأول طورت الخدمات السياحية بالمناطق الأثرية، والثاني ان الدولة استفادت بشكل مادي من الشركات دي نتيجة دخولها في المناطق الآثرية وادارة الخدمات اللي بتقدمها فيها .

بعد الشكل الكبير اللي حصل ده، قطاع السياحة بدأ يرجع تاني لتحقيق الارقام القياسية اللي كان بيحققها قبل كده، وفعلا في سنة 2023 السياحة حققت المعادلة الصعبة وكسرت الرقم القياسي اللي حققته مصر في 2010 واللي الكل بيعتبره عام الذروة السياحية واللي مصر وصلت فيه لـ14.6 مليون سائح،  لكن في 2023 مصر كسرت الرقم ده وحققت 14.9 مليون سائح، وحققت 14 مليار دولار وحاليا مصر مستهدفة تحقق زيادة عن الرقم اللي اتحقق السنة اللي فاتت بنسبة 5% وكان مستهدف نحقق ارقام اكبر من ده بكتير بس الظروف السياحية اللي موجودة في منطقة الشرق الاوسط اثرت بشكل كبير علي معدلات التوافد السياحي لمصر من الخارج .

مصر بتخطط للوصول بأعداد السياح ل30 مليون سائح ودخل يقدر ب30 مليار دولار بحلول 2030 ودا سهل يتحقق بعد صفقة رأس الحكمة والمشروعات السياحية الضخمة اللي بتتعمل دلوقتي من فنادق و قرى سياحية على طول الساحل الشمالي المصري والبحر الأحمر ومع ربطها بمشروعات خدمية تانية زي التسوق الدولي وتوطين البراندات العالمية هتحقق السياحة أرقام فلكية.