أفريقيا واحدة من المناطق المهمة بدرجة كبيرة جدا لمصر سواء علي المستوي الاقتصادي أو علي المستوي السياسي والاستراتيجي، وعلشان كده الحكومة عندها توجه خاص لدول قارة أفريقيا علي كل المستويات.. ياتري مصر بتعمل اية في دول أفريقيا واية اللي هيعود علي مصر من الموضوع ده.. خليكم معانا للآخر وهتعرفوا التفاصيل في الفيديو ده

مصر من زمن الزمن وافريقيا بالنسبة ليها أهمية خاصة  في التعامل خصوصا انها بتمثل ابعاد اقتصادية وسياسية بالنسبة لمصر، علشان كده مصر بتحاول بكل قوة تدفع عجلة التنمية بشكل كبير في دول كتيرة من قارة أفريقيا وخصوصا في فترة رئاسة الرئيس عبدالفتاح السيسي واللي وجه الحكومة بالدخول في العمق الأفريقي والدخول في المشروعات التنموية والخدمية بعدد كبير من دول القارة.

توجيهات الرئيس عبدالفتاح السيسي للحكومة بدأت تتنفذ بشكل مباشر علي أرض الواقع وحاليا بدأت نشوف مشروعات في قطاعات الطاقة والربط الكهربائي والتصدير والربط البري والبحري، وده غير التكامل السياسي اللي بقي موجودة بكل اغلب الدول الافريقية ومصر، وطبعا الترابط الاقتصادي واحد من أهم الملفات اللي الحكومة شغالة عليها حاليا.

طيب اية اللي بتعمله مصر علشان تزود العلاقات التجارية مع دول قارة أفريقيا؟.

مصر من فترة طويلة وهيا بدأت مشروع الربط السككي وعمليات الربط بين مصر ودول الشمال الافريقي والجنوب والوسط من خلال طريق القاهرة كيب تاون.
طريق القاهرة كيف تاون ده هيكون خط سيره هيربط اكتر من 10 دول إفريقية ببعضها البعض وهيكون علي مسافة 1155 كم في مصر، وهيساهم في اختصار المدة الزمنية بين شمال وجنوب إفريقيا بمتوسط 5 أيام بس، ويحقق حلم الربط بين القاهرة وجنوب إفريقيا لنقل الأفراد والبضائع بين مختلف الدول الأفريقية  .

مشروع القاهرة كيب تاون هينطلق من الإسكندرية للقاهرة فى اتجاه أسوان وهيمر بدول السودان وجنوب السودان وإثيوبيا وتنزانيا وكينيا وزامبيا وصولا إلى مدينة كيب تاون بجنوب إفريقيا، وهيكون أطول طريق برى فى إفريقيا. 

المرحلة الأولى من المشروع هتمتد من الإسكندرية لحد أرقين على الحدود بين مصر والسودان، هيمر الطريق بمحافظات الفيوم وبني سويف والمنيا وأسيوط وسوهاج وقنا والأقصر وأسوان في مصر، والطريق الجديد هيكون بمثابة محور لحركة التجارة بين مصر والدول الإفريقية، هيساعد على زيادة حجم التبادل التجارى بين دول مصر والسودان وإثيوبيا وكينيا وتنزانيا وزامبيا وزيمبابوي والجابون وجنوب إفريقيا.

الطريق الجديد هيسهل حركة النقل البري بين الدول اللي هيمر فيها وهيتيح لأي مستثمر أن ينقل ويصدر بضاعته لأي دول من الدول اللى هيمر فيها في وقت قياسي مش هيزيد عن 4 أيام عكس النظام اللي موجود حاليا واللي قايم علي حركة النقل بين دول قارة أفريقيا عن طريق البحر اللي بيستغرق شهور، ده غير انه هيكون مسار سياسي يخدم حركة التنمية الشاملة في كل القارة الأفريقية بشكل كامل .
طريق القاهره كيب تاون بيمثل سياسة مصر في الجمهورية الجديدة اللي بتعتمد على الشراكات الإقليمية وتوسيع نطاق التبادل التجاري بين مصر والدول وفي نفس الوقت بتفتح لمصر أسواق جديدة وواسعة للمنتجات المصرية ودا غير الفوائد السياسية اللي هتعزز مكانة مصر في عمقها الافريقي .