نفسك في شقة أحلامك بسعر يناسب دخلك؟ إيه اللي يمنعك لما يبقى التقسيط على 20 سنة وفايدة تبدأ من 8%؟.. هتاخد شقة جديدة في موقع مميز وممكن تستلمها فورى او بعد 3 سنين زي ما تحب .. وكل ده في مبادرة «سكن لكل المصريين 5» اللى مفتوحة دلوقتي لكل المواطنين بشروط بسيطة وأسعار تناسب الجميع.. تابع الفيديو ده للآخر وهتفهم كل حاجة عن المشروع

من النهارده 26 نوفمبر 2024 ولغاية يوم 24 ديسمبر 2024، باب الحجز مفتوح لكل المواطنين لحجز شقق فى مبادرة سكن لكل المصريين 5.. المبادرة الجديدة بتطرح أكتر من 78 ألف وحدة سكنية في أماكن مختلفة منها اللي تحت الإنشاء ومنها اللي جاهز للتسليم الفوري.. ولغاية دلوقتي  الإقبال كبير جدًا.. في الأسبوع الأول بس ذوو الهمم اشتروا أكتر من 43 ألف كراسة شروط ودفع حوالي 8307 عميل مقدم الحجز

لو ناوي تقدم هتلاقي نفسك قدام اختيارات كتير.. المساحات بتبدأ من 75 مترًا بأسعار تبدأ من 184 ألف جنيه، وممكن توصل لحد 700 ألف جنيه لمساحات أكبر كل ده متوفر في المحافظات والمدن الجديدة زي العاشر من رمضان، حدائق أكتوبر، 15 مايو، وأسوان الجديدة.

التقديم بسيط جدًا.. بتشتري كراسة الشروط من أقرب مكتب بريد مميكن بـ300 جنيه وتدفع المصاريف الإدارية بـ355 جنيه بالإضافة لمقدم جدية الحجز اللي بيبدأ من 20 ألف جنيه للوحدات بالمحافظات و30 ألف جنيه للمدن الجديدة

الخبر الحلو إنك مش محتاج تروح من أول يوم عشان تشتري كراسة الشروط مفيش أي أفضلية لأسبقية الحجز. الأولوية هنا مبنية على نظام واضح ومحدد كالتالى المتزوج اللي بيعول بيجي في المقدمة.. بعده الأرمل أو المطلقة اللي بيعولوا.. وبعدين المتزوج من غير أطفال أو الأعزب.. أما لو كان فيه تساوي في الظروف، الأولوية بتروح للأسر الأقل عددًا أو الأكبر سنًا.

طب والأسعار ونظام التقسيط اخبارهم إيه؟

بالنسبة للناس اللي بتدور على نظام مريح للدفع المبادرة بتوفر تقسيط يصل لحد 20 سنة بنظام التمويل العقاري.. الفايدة؟ 8% سنويًا لذوي الدخل المنخفض و12% لمتوسطي الدخل.. والمقدم بيبدأ من 20% من سعر الوحدة. لو اختارت شقة بتسليم خلال 3 سنوات، هتدفع أقساط ربع سنوية تبدأ من: 5 آلاف جنيه في السنة الأولى، تزيد لـ6 آلاف في السنة الثانية، وتوصل لـ7 آلاف في السنة الثالثة

أما الوحدات الجاهزة اللي بأسعار أعلى، فالأقساط هتبدأ من 7 آلاف جنيه وتزيد تدريجيًا

ولو عايز تسجل بياناتك الموضوع سهل ومباشر. كل اللي عليك تدخل على موقع صندوق الإسكان الاجتماعي وتبدأ ترفع الاستمارة والإقرار الموجودين في كراسة الشروط… وعلشان ما تقعش ضحية للناس اللي بتحاول تستغل الموقف، الصندوق نشر فيديوهات إرشادية على منصاته الرسمية، بتوضح خطوات التقديم والتفاصيل.

المبادرة دي مش بس فرصة تشتري شقة، دي فرصة تبدأ حياة جديدة بمكان يناسب احتياجاتك ودخلك. ومع نظام الدفع المرن والمساحات المتنوعة، أكيد هتلاقي اللي يناسبك متفوتش الفرصة لأن العرض محدود والشقق اللي بتتسلم فوري أكيد عليها طلب كبير

السؤال دلوقتي، مستني إيه؟
اختيار شقتك الأولى أو شقة جديدة لعيلتك ممكن يكون أسهل خطوة تاخدها النهارده.. جهز أوراقك وابدأ رحلتك مع «سكن لكل المصريين 5»