ليه اللي حصل في 2022و2023 مش هيحصل تاني ومفيش أزمة دولار هنشوفها وايه المفاجآت اللي المركزي المصري محضرها والأرقام بتقول ايه.. وايه حكاية صفقة ال10 مليار دولار.. خليكم معانا للآخر وهتعرفوا التفاصيل في التقرير  ده.
 

التدفقات النقدية 

طول ما فيه وفرة في التدفقات والاستثمارات المباشرة مش هيكون فيه أزمة دولار ولا هتظهر تاني .. دا قانون السوق في كل دول العالم واللي يقولك غير كده يبقي بيتسخف بعقلك وبيقول اي كلام وسعر الدولار مش مقياس على ضعف الجنيه لكن المقياس هو توافر الدولار من عدمه مش سعره زي ما قال المصرفي الكبير هشام عز العرب الرئيس التنفيذي للبنك التجاري الدولي.. 
طيب ليه بنقول مفيش أزمة دولار هتظهر تاني؟.

ارقام لازم تعرفها 

شوف ياسيدي الأرقام هي اللي بتقول مش احنا ولما يكون عندك تدفقات دولارية ضخمة من الاستثمار المباشر يعني فلوس جاية خام من بره وبتتحط في السوق المصري مباشرة يبقي قول على الدولار يالا السلام ومفيش أزمات راجعة بالعكس دا لما التدفقات بتزيد يبقي سعر الدولار هينزل من غير كلام ودا اللي هنشوفه الايام الجاية..وعاوز تعرف ليه بنقول كده.. شوف ياسيدي على سبيل المثال النهاردة حسام هيبة، الرئيس التنفيذي للهيئة العامة للاستثمار والمناطق الحرة اجتمع مع توموهو أوميدا، المؤسس والرئيس التنفيذي لشركة هينفرا البولندية، وحسين الغزاوي الشريك التنفيذي لشركة هينفرا البولندية في مص والاجتماع أهميته إنه كان مخصص لبحث طلب الشركة البولندية إنشاء مصنع لإنتاج الأمونيا الخضراء في مصر.

الاستثمار 

وحسب البيان الرسمي  الاستثمارات المبدئية للمشروع هتكون 1.6 مليار دولار من الاستثمارات الأجنبية المباشرة، وهتوصل  إلى 10.6 مليار دولار مع رفع الطاقة الإنتاجية إلى مليون طن سنوياً من الأمونيا الخضراء اكيد حضرتك مستوعب الرقم تقريباً 11 مليار دولار يعني قد قرض صندوق النقد الدولي مرة ونص تقريبا ودا استثمار في مشروع واحد في قطاع من أهم قطاعات التصنيع في مصر وتخيل كده من حجم المشروع والاستثمارات اللي فيه هيشغل كام شاب مصري وهيفتح كام بيت وحجم القيمة اللي هيضيفها للاقتصاد المصري والتصدير كمان.

تاني خبر مهم معانا بيأكد إن أزمة الدولار مش راجعة تاني كانت أرقام البنك المركزي المصري النهاردة بردو واللي كشفت عن قفزة في تحويلات المصريين بالخارج واللي قفزت خلال الربع الأول من السنة المالية 2024/2025 (الفترة يوليو/سبتمبر 2024) بمعدل 84.4% مسجلة 8.3 مليار دولار، مقابل  4.5 مليار دولار يعني اضاعفت في شهرين بس وحسب الأرقام .

تحويلات المصريين بالخارج 

تحويلات المصريين بالخارج قفزت خلال الشهور التسع الأولى من  2024 (الفترة من يناير/سبتمبر 2024)  بمعدل 42.6% لتصل إلى 20.8 مليار دولار (مقابل نحو 14.6 مليار دولار) وكل الزيادة دي اتضحت للبنوك المصرية وزادت من حجم المعروض النقدي..

كل الأرقام دي في حاجتين بس من موارد الدولار في مصر ومع وجود خطط لجذب الاستثمارات في السوق المصري واللي بتهدف لجذب 20 مليار دولار استثمارات مباشرة في السنة ودي أرقام أولوية والمؤشرات زي ما شفنا بتقول إن الرقم هيكون أكبر من كده بكتير جدا  مع الكلام عن صفقات خليجية ضخمة هيتم الإعلان عنها قريب جدا.