في أزمة كبيرة جدا هتحصل للناس بخصوص الدعم وبطاقات التموين في شهر ديسمبر الحالي، ياتري اية هيا الأزمة دي وهل الدولة هتقطع الخدمات التموينية للمواطنين فعلا

وزارة التموين والتجارة الداخلية في الفترة اللي فاتت اعلنت عن شوية شروط علي اساسها بيتم تنقية بطاقات التموين منها لو المواطن عنده عربية موديل 2017  فأعلى، ولو عنده أولاد في مدارس خاصة ومصروفاتهم المدرسة بتتعدي 50 ألف جنيها، ولو بياخد مرتب شهري مرتفع بيوصل لـ 24 ألف جنيه فأعلى، ده غير لو ارتكب مخالفة بخصوص سرقة التيار الكهربائي ولم مقدمش طلب لتركيب عداد كودي سواء من خلال شركات الكهرباء او المنصة الموحدة للكهرباء، وده في اطار خطة الدولة لتقنين الدعم ووصله لمستحقيه.

طيب اية هيا الأزمة الجديدة اللي هتحصل للناس في ملف التموين ؟.

مع بداية شهر ديسمبر الحالي في ناس كتير جدا من أصحاب البطاقات التموينية فوجئوا بوقف بطاقاتهم التموينية من بداية الشهر، وكمان البطاقات مش بقت بتصرف خبز مدعم زي ما كان بيحصل زمان، خصوصا أن وزارة التموين كانت بتوقف صرف الدعم التمويني للمخالفين، ولكن صرف الخبر المدعم بيفضل شغال زي ما هو بدون وقف.

البطاقات الجديدة اللي وزارة التموين والتجارة الداخلية وقفتها كانت بسبب ارتكاب اصحابها لمخالفات تتعلق بالحصول علي التيار الكهربائي بشكل مخالف سواء سرقة من وراء العدادات أو عدم التقدم لتركيب عدادات كودية في المباني والوحدات السكنية المخالفة خصوصا أن الدولة كانت قررت عودة تشغيل بطاقات التموين في شهر نوفمبر اللي فات للناس اللي عندها مخالفات في توصيل الكهرباء، ومنحت فرصة شهر كامل ما تتخذ اجراءات جديدة بوقف الدعم بشكل كامل لحين تقنين الأوضاع والتقدم  بطلبات لتركيب العدادات الكودية .

وزارة التموين قالت كمان أن المواطنين اللي بيحصلوا علي الكهرباء بنظام الممارسة هيشملهم قرار وقف الخدمات التموينية سواء كان صرف السلع التموينية أو صرف الخبر لحين التقدم بطلبات لتركيب عدادات كودية للبيوت والوحدات السكنية اللي قاعدين فها برضوا، خصوصا أن الدولة بتعتبر الحصول الكهرباء بنظام الممارسة كانه واقعة سرقة تيار.

طيب عدد بطاقات التموين اللي هيتم وقف وقفها هتوصل لكام؟.
وزارة التموين والتجارة الداخلية قالت أنه هيتم وقف 250 ألف بطاقة تموينية بسبب تطبيق محددات استبعاد جديدة للعدالة الاجتماعية بداية من شهر ديسمبر الحالي واهمها عدم تقنين الأوضاع بخصوص الحصول علي التيار الكهربائي.