مصر حاليا بتحاول بكل الطرق انها تزود الاستثمارات الأجنبية في الأسواق المحلية وواحدة من الاستثمارات اللي الحكومة شغالة عليها بقوة هيا الاستثمارات الألمانية.. ياتري مصر بتعمل اية في الملف ده.. ومصر مستهدفة توصل لكام استثمارات ألمانية في الفترة الجاية وليه ألمانيا بالذات.. تابعونا للنهاية وهتعرفوا التفاصيل في الفيديو ده

الفترة الرئاسية الجديدة للرئيس عبدالفتاح السيسي، الشغل الرئيسي فيها هو النهوض بقطاع الاستثمارات وتعديل مسار الاقتصاد المصري وده اللي الحكومة بتحاول تعمله بكل الطرق، وكل وزير علي راس الوزارة بتاعته شغال علي جذب الاستثمارات الأجنبية في المجال بتاعه، خصوصا أن مصر عندها تراجع كبير في قطاعات رئيسية كانت مصدر اساسي من مصدر الدخل القومي المصري زي قناة السويس واللي ايراداتها تراجعت باكتر من 60% بسبب الاحداث السياسية اللي موجودة علي طول حركة الملاحة البحرية في البحر الأحمر.

الحكومة المصرية حاليا شغالة علي جذب كل أنواع القطاعات الاقتصادية خصوصا أن الفاتورة الاستيرادية لمصر مرتفعة جدا واعلي بنسبة كبيرة من الصادرات، وده عامل خلل في الميزان الاقتصادي المصري، وعلشان كده الرئيس عبدالفتاح السيسي وجه الحكومة باعادة تشغيل وإحياء المصانع اللي متوقفة عن العمل، وكمان تذليل العقوبات وتعديل التشريعات اللي كانت عقبة قدام استقبال الاستثمارات الأجنبية المباشرة واللي كانت برضوا سبب اساسي في هروب عدد كبير من الاستثمارات والشركات اللي موجودة في مصر .

طيب اية اللي عملته مصر علشان تحفز دخول الشركات والاستثمارات الأجنبية في مصر ؟.

الدولة في الفترة اللي فاتت اشتغلت علي حاجات كتيرة متعلقة بالاداء الاقتصادي في مصر، واحدة من اهم الحاجات اللي الحكومة اشتغلت عليها هيا توحيد سعر صرف الجنية المصري قدام العملات الاجنبية خصوصا أن السوق السودا في التجارة بالعملات كانت عن عبارة عن نار بتاكل في الاقتصاد المصري، وكانت واحد من اهم اسباب هروب شركات رؤوس الأموال الأجنبية من مصر، خصوصا أن مفيش مستثمر هيدخل يعمل مشروع أو يبني مصنع في دولة فيها أكتر من سعر صرف للعملات، وده بيخلي المستثمرين يشتروا المواد الخام باكثر من سعر في اليوم الواحد بسبب التغيرات اللي بتحصل في السوق السوداء في اليوم الواحد، وقرار الدولة بتحرير سعر صرف العملات بشكل مرن خلي في حافز كبير عند الشركات في الدخول للسوق المصري والاستثمار خصوصا أن مصر قدمت حوافز كبيرة للشركات الأجنبية  .

طيب مصر بتعمل اية علشان تعظم دخول الشركات الألمانية للسوق المصري؟.

رئيس جهاز التمثيل التجاري يحيى الواثق بالله، قال أن مصر حاليا بتتطلع لزيادة حجم الاستثمارات الألمانية بنسبة 20% في السنة اللي جاية علشان توصل لحدود 3.6 مليار دولار، مقابل نحو 3 مليار دولار حاليا بزيادة 600 مليون دولار .

رئيس جهاز التمثيل التجاري قال أن مصر فعلا عملت محادثات مع ألمانيا، على هامش القمة الاقتصادية بين مصر وولاية شمال الراين لتعزيز التعاون الاستثماري في مجموعة كبيرة من القطاعات هتشمل السيارات الكهربائية وتكنولوجيا المعلومات والسياحة والرعاية الصحية ومجال تدريب العمالة، وأكد أن مصر بتتطلع لزيادة التبادل التجاري مع ألمانيا من 7 مليار يورو سنويًا، إلى 9 مليارات يورو بنهاية السنة اللي جاية بزيادة 30%.
طيب ليه ألمانيا بالذات ؟
فاكرين مرة تصريحات الرئيس السيسي لما كان في زيارة لألمانيا وقال في مؤتمر صحفي إن الشعب المصري لينظر بإعجاب للشعب الألماني وإنه التجربة الألمانية ملهمة للدول التانية كان حلم الرئيس السيسي إن مصر تبقي زي ألمانيا في التصنيع والجودة العالية للصناعات والمنتجات وشعب بيعشق العمل بضمير وتفاني وفي نفس الوقت يبقي زي اقتصاد ألمانيا الجبار في أوروبا واللي بيقود الاقتصاد الأوروبي كله وعشان كده التعاون مع ألمانيا اقتصاديا ليه وضع خاص جدا  مستمد من محاولة الاستفادة القصوى من التجربة الاقتصادية الألمانية.