كشف المنتج الفنى، جمال العدل، تفاصيل حبه وعشقه لنادي الزمالك، قائلا: “الأمر لا يتعلق بي وحدي، وأغلب جماهير الزمالك بنفس هذا الشغف”، موضحا أن نادي الزمالك عاش نحو 20 عامًا من عدم الاستقرار الإداري، ورغم ذلك ظل الجمهور يزداد، والنادي يحقق البطولات وينافس بقوة.
وأضاف: «أتحدى لو ريال مدريد مرّ بكل اللي مرّ بينا… كان اختفى من على الكوكب. إحنا واقفين بسبب الناس الحلوة اللي بتحب النادي»، مشيرا إلى أن جمهور الزمالك موجود في كل مكان داخل مصر وخارجها، وهو السبب الرئيسي وراء ثبات النادي رغم كل الظروف.
وعن سبب ارتباطه الشخصي بالزمالك قال: «من وأنا في سن تلات أو أربع سنين وأنا بروح النادي وبشجع، وبابايا وسامي ومدحت زملكاوية…».
وعن رأيه في اتهامه بأنه «محارب الزمالك الأول»، قال إنه يتصرف حسب الموقف: «لو الأهلي عمل حاجة مش لطيفة… بنتقده، ولو الزمالك اتهاجم أو اتعرض لشيء غلط… هدافع عنه».
ونفى جمال العدل، خلال لقائه في بودكاست “حكاية مدير مع نهي سعد”، إمكانية توليه منصبًا إداريًا داخل النادي، قائلا:” العمل الإداري محتاج تفرغ… وأنا مش متفرغ، وكمان ما برتاحش للشغل من النوع ده. ماينفعش مهاجم يضيع جون وأنا رئيس النادي! أنا عايز أفضل أشجع وأساعد النادي من غير مناصب».
وردا علي سؤال هل يقبل تزويج بناته من مشجع أهلاوي، رد المنتج جمال العدل العزل مازحًا: “أشك إن بنتي أصلاً هتحب أهلاوي! أول سؤال عندنا في العيلة: حضرتك زملكاوي ولا أهلاوي؟»، وأضاف أنه رغم ذلك سيقبل «طالما العريس كويس»، مستشهدًا بأن بنت عمرو الجنايني متزوجة من وائل جمعة، واختتم ضاحكًا: «نص الشركة عندي أهلاوية… وبسيبهم عشان لما الزمالك يكسب أعرف أطلّع عينهم”.